Rai leit iasoh noh ka PDF sha ka NPP, yn pdiang u MR ka jylla

Shillong:Ka Peoples Democratic Front (PDF) ka la rai ha ka sngi Thohdieng ha ka jingïalang jong ka General Council ban leit iasoh noh sha ka National People’s Party (NPP) lashai ka sngi Saitjaiñ.

Ïa ki Nongïalam bad ki MLA ka PDF yn pdiang da u National President ka NPP bad Myntri Rangbah ka Jylla Conrad K Sangma ha ka jingïalang ka ban pynlong ha Ophis treikam ka NPP, ha ka por 4 baje janmiet.
Ha kane ka sngi kan don ruh ka jingïasoi ïa ka soskular bynrap (merger) hapdeng u President ka PDF bad MLA ka Sohra Bah Gavin M Mylliem bad u National President ka NPP Conrad K Sangma.

U Bah Gavin ula pynshai ba kan nym don satia ka jingpynduh pyndam noh ïa ka PDF hynrei kan don da ka jingïateh soskular ban bynrap (merge) sha ka NPP.
Haba ïadei bad ka shuki Myntri Sorkar, u Bah Gavin ula ong ba ka PDF kan ieh ha ka jingstad jong u Nongïalam ka NPP bad Myntri Rangbah ka Jylla.
Haba kylli ïa ki daw ka jingleit bynrap, u Bah Gavin ula ong ba hadien ka jingïatreilang bad ka Sorkar MDA-I ba ïalam da ka NPP, ka PDF ka sngew ïahab bad ki rukom treikam jong ka NPP. “Kiba bun na ki mat treikam ka NPP ki ïahab bad jong ka PDF,” ula ong.

Lah ban kdew hangne ba ka PDF ka dei kaba la pynkha ha u snem 2017 bad ka la jop 4 seat ha ka elekshon MLA 2018. Hynrei arngut na ki MLA jong ka, kila iehnohkam bad leit ïasoh sha ka NPP.
Ha ka elekshon MLA 2023, ka PDF kala lah ban jop tang 2 ngut, u Bah Gavin M Mylliem na Sohra bad u MLA ka Mawkynrew Bah Banteidor Lyngdoh.

Ka khubor ba la ïoh lum ka ïathuh ba ki kyndon ha kane ka soskular kan dei eh ki jingkular ba la khlei da ka PDF ha ka elekshon manifesto 2023.
Da kane ka jingïasoh ka PDF, ka NPP mynta ka la don haduh 28 ngut ki MLA ha ka Ïingdorbar ba 59 ngut ki MLA. Ka NPP ka donkam sa 3 ngut ki MLA ban ïoh ïa ka absolute majority (palat ïa ka shiteng).