Rai ki Sengbhalang Jaintia ban pakhang surok 2 miet Byrngem ban ym shim bynta ha ka elekshon MP

Shillong,17 Lber:
Ki 5 tylli ki Sengbha lang na Ri-Lum Jaintia ba kynthup ia ka KSU-Jaintia Hills District Unit, ka AJYWO Sengkmie, ka HNYF-East Jaintia Zone, ka FKJGP-Khliehriat Circle bad ka Synjuk Rang bah Shnong-East Jaintia Hills ki la shim ia ka rai ban bteng biang ia ka jingia khih da pakhang surok miet kaba 2 miet kata ha ka 20 bad 21 tarik mynta u bnai. Ki la shim ia k atei ka rai ha ka jingiakynduh lang jong ki mynta ka sngi ha Community Hall Khlieh riat West, East Jaintia Hills District. Katei ka rai ia khih ba ki Sengbhalang ki la shim ka long na ka bynta ban pynbor ia ka sorkar Meghalaya bad ka National Highway Authority of India ban maramot noh ia ka surok bah NH -44 naduh Soomer haduh Malidor. Katei ka pakhang surok miet jong kitei ki san seng kan trei kam tang hapoh u pud u sam jong ka East Jaintia Hills District kata naduh Tuber Shohshrieh haduh Malidor.
U Bah SS Niangti General Secretary KSU-Jaintia Hills District Unit u la ong ba ia mynta ki sengbhalang ki khot shuwa da ka pakhang surok miet namarba ki dang bun ki khynnah pule kiba dang long eksamin bad lada ka sorkar kam patiaw ban maramot ia ka surok ki la byrngem ban shim da kiwei pat ki jingiakhih kiba tyngeh. “Ngi lah ruh ban shim da ka rai ban ym ia shim bynta ( Boycott) ha ka elekshon MP ha East Jaintia Hills District” ong u GS ka KSU.
Shuh shuh utei u nongialam ka KSU u la pynpaw ia ka jingjynjar ba ki paidbah ki ia kynduh na ka jingsniew palat ka tei ka surok, bad u la ong ba lada ka sorkar kam maramot noh ha kum kane ka por ba dang rang ka bneng, lap ba wan sa ka aiom lyiur bad kin nang mih shibun pat ki jingeh. U la kyntu ia ki paidbah naduh ki rangbah shnong ki sengbhalang ba kin ia shim bynta lang ha katei ka pakhang shnong ba 2 miet ka ba ki 5 seng ki la khot.U la ong ruh ba ha katei ka pakhang shnong yn pyllait tang ia ki kali kit nongpang, bad kit ki ban don ha ki kam ba kyrkieh bad ki bym lah shuh ban kiar, ka kyrwoh na u Bah Niangti ka la ong ba kiba leh pyrshah ia katei ka jingkyntu ka seng kin shim hi ka jingkitkhlieh.