Shillong, 11 Nailur:
Ki samla wad kam Lower Primary (LP) skul kiba la kam ba ki la shah pyndam sia lih noh ka kyr teng jongki, ki la shim ia ka rai ban iakhun haduh kaba kut tad haduh ban da ioh ia la ka jong ka hok.
“Ngin iakhun haduh kaba kut, ngin nym lah ban pynkhuid ia baroh ki tnad sorkar, hynrei ia kane kawei ngin iakhun haduh kaba kut khnang ba kan nym don shuh shuh kano kano ka jingleh buittuh ne leh thok, hynrei ki samla kiba dei hok ban ioh ki dei ban ioh kam” la ong uwei napdeng ki samla wad kam LP skul haba kren ha u nongaikhubor.
Une u samla u bym kwah ban pynpaw kyrteng u la ong, ngi la dep ai mukotduma pyrshah ia ka sorkar, la pynlong da ka jingtohkit CBI ha kaba la lapa ia ki jingleh shukor jong ki bor ba halor bad mynta la thung da ka kynhun tohkit High Level Scrutiny Committee (HSLC), kumta ngi kwah ba sorkar ka dei ban leh ei ei halor kane, u la bynrap.
U la iathuh ruh ba lada ka sorkar kam leh ei ei halor kane kin sa lum da ka jingialang paidbah bad kumjuh ruh ban dawa na ka sorkar ba kan leh ei ei bad kumjuh ruh ba kin leit ai syndon da ka jingujor sha ki pulti namar ia ka jingujor ba la dep ai kham mynshuwa ki pulit kim shym pat leh ei ei bad kim pat pynlong satia ia ka jingtohkit.
Lah ban pynkynmaw hangne ba ka kong Agness ka la pan ia ka kaiphod lyngba ka RTI ha ka 2 tarik u Nailar katba na ka liang jong ka HLSC ba la khlieh da u bah EP Kharbhih kaba la leit rah ia ka kaiphod sha u bah PS Thangkhiew Principal Secretary jong ka tnad pule puthi ha ka 30 tarik Naitung, hynrei na ka liang jong u Public Information Officer (PIO) jong ka tnad pule puthi, Bah BS Sohliya haba jubab ia ka jingkylli pan RTI jong ka kong Agness Kharshiing u la ong, ka kaiphod kam don satia bad ka tnad pule puthi.
Phi don ban ong eiei?