Rai ki rangbah shnong na ki 10 shnong ba hap ha Mawhati ha ka MLA ban kyrshan ia u kyrtong NPP ha ka MDC na Umroi

Nongpoh, 29 K’lyngkot: Na bynta ban suk ha ka rukom treikam hapdeng u MLA bad MDC, ki rangbah shnong na 10 tylli ki shnong kiba don ha ka thain Liarbang ter ter haduh Mawshut, ki la pynlong ia ka jingialang ban pyrkhat na bynta ban kyrshan ia u kyrtong ha kane ka Ilekshon jingjied Nongmihkhmat sha Khasi Hills Autonomus District Council (KHADC)

Katei ka jingialang jong ki Rangbah shnong na kitei ki 10 tylli ki shnong kiba don ha katei ka thain, ka la long mynta ka sngi ha shnong Khlieh Umstem, ha kaba lyngba katei ka jingialang, ki la shim ia ka rai ban kyrshan tyngeh ia u Bah Rangkynsai Kharbuki, Kyrtong ka NPP u ban sa iakhun na Umroi Constituency.

Ka nongrim kaba la pynlong ia kitei ki nongialam shnong, ba kin hap ban pynlong shwa ia ka jingialang hashwa ban jied ia u Kyrtong MDC, ka halor ka nongrim ba kitei ki shnong kiba don ha katei ka thain, ha ka MLA ki ngat ha ka Mawhati Constituency, katba ha ka MDC pat ki don ha Umroi Constituency, kumta haba u MLA jong ki u don ha ka NPP, na ka liang jong kitei ki nongialam shnong ruh ki kwah ba u MDC ruh u dei na ka NPP, khnang ban suk ha rukom treikam bad khamtam eh haba iadei bad ki kam pynroi ha katei ka thain.

Ki rangbah shnong, kiba la kren sha ki lad pathaikhubor, kiba kynthup ia u Bah Fairly Teron, Rangbah Shnong Khlieh Umstem, u Bah Jeswell Shadap, Rangbah Shnong Umdohthli, u Bah Pius Tado, Rangbah Shnong Liarbang lem bad kiwei, ki la ong ba ka nongrim kaba la pynlong ia ki ba kin hap kyrshan ia u Bah Rangkynsai Kharbuki, namar ki kwah ban don ka jingiatreilang hapdeng u MLA Mawhati bad u MDC.

Nalorkata, ki la ong ruh ba kumba dang shen ba ka Mawhati ka la ioh la ka jong ka C&RD Block, hynrei kitei ki shnong kiba la kham jngai sha Mawhati, ki la kmen eh ba kitei ki shnong ha katei ka thain ki la shah pynhap noh sha ka Bhoirymbong C&RD Block bad halor kata, ki la ai jingiaroh ia u Bah Rangkynsai Kharbuki, uba la pynkren lem da kaba leit ban kynduh ia u Bah Prestone Tynsong, na bynta ban kren ia katei ka kam kaba kwah da ki paidbah ka la urlong shisha bad kaba la pynsuk ia ki paidbah.

Kumba haba iadei bad kane ka Ilekshon MDC, na ka liang kitei ki nongialam shnong, ki la kyntu ia ki paidbah kiba shong ba sah ha katei ka thain, kata naduh Liarbang ter ter shaduh Mawshut, ba ha kane ka kynti kaba mynta, ba ki dei ban kyrshan ia u Kyrtong ka NPP ha Umroi, khnang ban suk ka rukom treikam hapdeng u MLA bad MDC, ka ban sa long ruh ka jingmyntoi na bynta ki paidbah kiba shong ba sah ha katei ka thain hi baroh kawei.