Rai ki Rangbah Shnong ban dawa kynriah noh ia ki khar metor

Shillong:

Ka jingialang jong ki rangbah shnong ki 12 tylli ki shnong ka thain ba pynjari korphiw ha kane ka sngi Saitjain, ka la rai ba dei ban pynkynriah noh ia ki khar metor na ka jaka ba ki don mynta na them Iewmawlong sha kawei pat ka jaka khnang ban wanrah biang ia ka shong suk shong sain.
Haba kren sha ki nongthoh khubor hadien ba la wai ka jingialang, u MLA ka North Shillong u Bah Adelbert Nongrum u la ong ba ka jingialang ka la dawa na ka sorkar ban kynriah noh ia ki khar metor na katei ka jaka na them Iewmawlong.
“Ngi la rai ban dawa ba ka sorkar ka dei ban pynkynriah noh ia ki khar metor na them Iewmalong sha kawei pat ka jaka, namar ba ka jingdon jongki, ha katei ka jaka, ka dei kawei kaba ju wanrah ia ka jinghuri hura ha ki snem ba la dep”, la ong u Bah Adelbert.
U la ong ba ka la rai ruh ba ka sorkar ka dei ban pyllait noh ia baroh ki briew ba shah kem na kane ka jingjia.
Kawei pat ka rai ka jingialang ka long ban kyntu ia ka sorkar ba kan pynlong biang ia ka eksamin ia ki nonghikai namar ba ka jingpynjari korphiw ka la pynduh ia kiba bun ban ioh ialeh ia kane ka eksamin.
“Ka jing pynkynriah noh ia ki briew na harijan colony, them Iewmawlong ka dei ban long da ka jingsngewthuh jingmut bad jai jai, bad ym dei ban mih kano kano ka jingsngew iapher jait na kane ka kam”, la ong u bah Adelbert.
Katkum ka jingong u MLA, ka la don kam ban pynkynriah kyrkieh ia ka Harijan Colony namar katei ka jaka ka la khapngiah palat bad kam iahap satia ban pynlong shnong ha ka jaka iew.
U la ong ba ka sorkar ka lah ruh ban thaw ia ki ing ban ai jaka sah ia ki nongshong madan khamtam ia ki trai shnong.
U Bah Adelbert u la ong ba ka sorkar ha ki por ba la leit kam don kata ka mon ne jingsngewkhia ban leh ia kane bad u la bynrap ba na ka liang ki Rangbah Shnong bad ma u kum u MLA ban dawa ia ka jingdonkam ban pynkynriah noh ia ka Harijan Colony.
Ha kawei pat ka liang, ki nongpyniaid jong ki 12 tylli ki Durbar Shnong ki la kyntu ia ki pulit ba kin nym rung sha ki shnong ki thaw ne ki phyllaw jong ki ïing briew namar ka wanrah ia ka jingshong syier ia ki paidbah kiba sah ki dong bapher bapher marjan bad ka Motphran.
Ha kajuh ka por ki la kyntu ruh ia ki bor ka aiñ ban tyngkan ka jingsiat ia ki tyndong pynsat tdem namar ka ktah ia ki nongshong shnong.
U la ong ba ka jingbym lah jong ki pulit ban kem mardor ia ki runar ka la wanrah ia ka huri hura kumba ka long mynta.