Shillong: Mynhynnin ka sngi ka la don ka jingiakynduh jong ki ASHA kiba trei ha kane ka jylla kiba don hapoh ka lama jong ka Meghalaya ASHA Workers Union ban ia kren halor ki jingeh ba ki ia kynduh,namar ka jingbym pyllait ka sorkar ia ka pisa kaba dei ka bhah kaba ki dei ban ioh jingmyntoi na ka sorkar.
Haba ia kren bad ka Acting President jong katei ka kynhun ki ASHA ka kong Soni Kharjana, ka la iathuh ba naduh u snem 2014 ka sorkar kam shym la pyllait ia ka ASHA Benefits Scheme (ABS) bad naduh u 2012 ym shym la pyllait ia ka Meghalaya Maternity Benefits Schemes (MMBS). Ka kong Soni ka la iathuh ba kaba ki ioh mynta ka dei beit tang ka jingai sngewbha (Honourarium) kaba ki ioh na ka sorkar pdeng katba ia kitei kiwei pat ki jingmyntoi dei ban ioh na ka bhah jong ka sorkar jylla.
Haba kheiñ ia baroh ka pisa ka la ong ba ka la bun bha da ki phew klur tyngka, dei na katei ka daw ba ki ASHA ki la sangeh treikam naduh ka 20 tarik u nailar bad kin dang iai bteng ban sangeh treikam katba ka sorkar kam pat pyllait ia ka bhah jong ki. Ka la iathuh ba ki don kumba 7000 haduh 8000 ngut ki ASHA ha ka jylla, hynrei la ia phiah noh ki Khasi Jaintia la ka jong bad ki Garo la ka jong. Ha Khasi -Jaintia ka la ong ba ki don kumba 5000 ngut tam.
Naduh ba la sangeh treikam naduh ka 20 tarik u nailar haduh mynta ka sorkar kam shym la khot ia kren satia ia ki, “Ngi la pyrshang ban ia kren hynrei ki ong khie leit wad ia ka pisa na ki district, ngi lah ia kut ba la kumno kumno lada khyndiat eh ki dei ban pyllait 50% namar ba ka pisa ka la bun bad nangta kin sa weng ia khih, hynrei ka sorkar ka siew pynban tang 10%. Ngin dang bteng ia ka jingiakhih jong ngi haduh ba ngin da iohi ia ka jingkheiñ ba ka sorkar kan phah sha ka Ministry na ka bynta ka bhah ki ASHA” ong ka kong Soni Kharjana.
Ka la iathuh ba tang ha ka block Mawphlang ka jingsiew ba ka sorkar ka dei ban siew ka long T.80 lak tyngka hynrei por pyllait pisa ka pyllait tang T.8 lak tyngka. Katei ka nongialam ki ASHA ka la ong ba lada don ne ym don pisa ka sorkar ka la dei ban khot ia kren ban sngewthuh hynrei ka sorkar kam leh bym buidniew satia bad dei na katei ka daw ba ki la shim ia ka rai ban bteng ia ka jingsangeh treikam jong ki.
Kaei ka kam ki ASHA??
Haba ki ASHA ki ia khih na ka daw ba ka sorkar kam siew ia ka jingsiew bad ka bhah ba ki dei ban ioh jingmyntoi , u Rupang u la kylli na ki ASHA ia ka kam kaba ki hap ban trei. Ka Acting President jong ka Meghalaya ASHA Wrokers Union ka kong Soni Kharjana ka la ong ba ka kam ki ASHA ka dei kaba bun bha. Ki hap ban leit pyndih dawai ia ki khyllung ne kiba pang sha ïngsah jong ki, ki hap ban leit thew kilo 5 haduh 6 sien ia ki khyllung kiba dang shu kha kiba hapoh ka shibnai shiteng, ki hap ban ialam ia ki kynthei ba armet sha ki jaka sumar ban shah eksamin, nangta ki hap ban ialam sha ki jaka sumar haba ki longkmei armet ki leit kha khun.
Ki hap ban leit synran bad iarap ia ki Nos haba ki wan sha ki shnong, ki hap ban leit jingialang shisien shibnai bad ki hap ban pynlong jingialang ha ki shnong shisien shibnai ban batai shaphang ka koit ka khiah, ki hap ban pynbiang ia ki rikod ha ki rejistar kum ka sngi iap ka sngi kha bad kiwei pat kiba ia dei bad ka koit ka khiah.