Rai ki 13 seng ban iaid beit ka rah lama iong ha ka 5 tarik

Jowai, 3 Rymphang:
Ki 13 tylli ki seng bhalang ha rilum Jaintia kiba kynthup ia ka JSU, KSU-JHDU, HNPF- JHC, MPUF, RJYF, JSM, JNU, WJNC, CRJM, JYF bad kiwei kiwei ha ryngkat bad ka jingkyrshan jongki Rang bah Shnong ki la shim ia ka rai mynta ka sngi ba ka jingrah lama iong ha sor jowai kan iaid beit kumba la rai.
Kane ka rah lama iong kan sdang ha ka por 11.00 baje mynstep, na Lad-Nartiang (Lad College KNGC) sha duh sha madan Jrisalein.
Ki sengbhalang ki la shim ia ka rai ban pynlong ia kane ka rah lama iong kum ka dak ban pyrshah jur halor ka jingsngap mynthi ka sorkar ban pynkynriah ia u Deputy Commissioner bad ia u Additional Superintendent ka West Jaintia Hills.
Kat kum ka kyrwoh khubor na kitei ki 13 seng ka la ong, “Namar ba ka sorkar kam pathiaw satia ia ki jingdawa jong ngi ki 13 tylli ki sengbhalang naka bynta ban pynurlong bad pynioh lut ia ki jingdawa ka KNGCSU kumjuh ruh ban ban pynkynriah ia u Deputy Commissioner ka West Jaintia Hills u Arun Kumar Kembhavi bad ia u Additional Superintendent of Police u ma ShemphangSyrti kiba la ai hukum ia ki pulit ban kawang Bom pynsat khmat, kawang Lathi bad siat um ia ki samla KNGC kat haduh ba ki la mynsaw bad poi Hospital nalor ka jingdawa ban siew bai lutsan ia baroh ki samla pule kiba la mynsaw, bad ruh ban weng iaka FIR pyrshah ia ki samla pule bad ki sengbhalang kaba la ujor da ka bor District”.
Kumta na ka liang jong ki 13 Sengbhalang ki khot bad wer ia baroh naduh ki Rangbah Shnong, Rangbah dong jong ki shnong ki dong bapher bapher, ki nong shongshnong baroh jong ka thain Ri lum Jaintia (East & West Jaintia), ki Kmie ki kpa jong ki samla ba pule ha KNGC bad kiwei, ki samla pule baroh bad ki para sengbhalang baroh ki ba sngewkhia ia kane ka iap ka im jong ka Jaitbynriew, ba kin sngewbha ban ia mih paitbah ban ia wan sha ka ne ka jingia iaid paidbah ban pyni ia ka jingsngewkhia jur halor kane ka jingbom kput ki bor jong ka ain ia ki samla pule kiba ia khih da kaba jai jai na ka bynta ka hok bad ka lawei jong ki khynnah pule ka Ri lum jaintia.