Shillong: Ka United Democratic Party (UDP) ka la rai ban pynskhem ia ka kyrteng u Bah Pius Marwein kum u kyrtong na ka bynta ka elekshon shiteng samoi ban long ha ka Ranikor konstitwensi bad ka la buh ka jingkyrpad ia u Bah Pynshngain N Syiem ban shu ai ka jingkyrshan ba radbah ban pynjop ia u kyrtong ka seng riewlum.
Ki nongialam ka UDP, Bah Jemino Mawthoh, Bah Paul Lyngdoh, Bah BM Lanong bad Bah Embhah Syiemlieh, haba kren sha ki kotkhubor ha ka Sngi Balang:Wlytan
Mynhynnin ka sngi, ka UDP bad ka People Democratic Front (PDF) u Bah Pynshngain, ki la iakynduh ban iakren ia kane kam na ka bynta ban pyniakhun tang uwei u kyrtong bad ka UDP, hadien ba la bynshet ia ka kam ban rai, ka la pynskhem ia u Bah Pius Marwein kum u kyrtong.
Ka UDP ka la buh ruh ka jingtyrwa ia u Bah Pynshngain ban iapein ne ban pyrkhat kyrpang na ka bynta ka MDC elekshon ka ban sa long lashem snem na ka bynta ka Mawsynram lada un kloi ban kyrshan lang ia u Bah Pius ha kane ka elekshon na Ranikor.
“Wat la u Bah PN Syiem u la ioh ka jingiaroh na ki paidbah halor ka jingnud ban ialeh pyrshah ia u Dr Mukul Sangma hynrei ha kaba iadei bad ka Ranikor konstitwensi, ka don jingeh ia u namar ba kane ka konstitwensi ka dei kaba heh bad kaba iar, bad kam long kaba suk ban pyndep ban iaid tang hapoh shi bnai ne ar bnai khamtam haba ka elekshon ka lah ban long tang hapoh kine ki ar bnai eiei”, la ong u general secretary ka UDP u Dr Jemino Mawthoh.
U la ong ba hadien ba la iathir sani, ka UDP kaba la bynshet ban shim ia ka rai, ban pynskhem ia u Bah Pius Marwein kum u kyrtong.
“Hadien ba la iakren bha, ka long kaba bha eh ia u Bah PN Syiem ba un shu ai ka jingkyrshan ia u kyrtong ka UDP ha kane ka elekshon MLA na Ranikor bad ka seng kan sa pyrkhat ha kaba iadei bad ka MDC elekshon na Mawsynram, kumba u la tyrwa ban don ka jingiatreilang jong ki seng rierwlum”, la ong u Dr Jemino.
U general secretary ka UDP u la ong ruh ba u kyrtong ka UDP u Bah Pius ha kane ka elekshon ba dang shu dep, u la wan baar da kaba kamai 8950 vote, wat la u dang shu mih thymmai ban iakhun ia ka elekshon.
“Ka HSPDP ruh ka la pynskhem ban ai ka jingkyrshan ia u Bah Pius ha kane ka kynti na Ranikor bad mynta ka sngi, ka jingialang ha Nongnah ruh la wan ban ai jingkyrshan lang da ki nongkyrshan ka NPP, ka BJP ba la don lang ka nongialam ka kong Pelcy Snaitang bad ki nongkyrshan ka Congress”, la ong u Dr Jemino.
Katkum ka jingong u Dr Jemino, lada u Bah Pynshngain u don ka mynsiem rangbah ban wan ai jingkyrshan lang ia u kyrtong ka UDP, khlem pep kan kham suk shibun ban ioh ia ka jingjop ha kane ka kynti.
U la ong ba ka jingrai ban pyniakhun ia u Bah Pius kam dei ba leh donbor da ka UDP hynrei ka la shim ia kane hadien ba la bishar sani ia ka jinglong jingman ka Ranikor bad ka la bud ruh ia ki kyndon kumba la mynjur kham mynshwa ka coordination committee ka UDP bad PDF, kaba long ha ka 10 tarik mynta u bnai.
“Kane ka jingialang mynta ka sngi, ka dei ka jingbteng na ka jingialang kaba long ha ka 10 tarik Naitung, ha kaba la don lang u Bah Pynshngain, uba la pynpaw ba la ieh ha ka UDP ban shim ia ka rai”, la ong u Dr Jemino.
U la ong ba ka UDP ka khot lang ruh ia baroh ki seng riewlum ban long kawei ban iakyrshan ia u Bah Pius khnang ba un pynthikna ban ioh ia ka jingjop ha kane ka elekshon.