Shillong: Ka UDP Garo Hills, ka la rai ban iakhun ia ka elekshon shiteng samoi na ka bynta ka South Tura ha kaba u Myntri Rangbah ka jylla, u Conrad K Sangma un iakhun na ka NPP.
Ka khubor na ka UDP, ka la iathuh ba ia kane ka rai ban iakhun ia ka elekshon la shim ha ka jingialang kaba long hynnin ka sngi ha ingsah u President ka UDP Garo Hills u BG Momin.
Ka UDP ka dei ka party kaba don lang ha kane ka sorkar ba ialam da ka NPP nalor ka BJP, HSPDP, NCP, nalor kiwei ki MLA shimet.
Ka South Tura ka la sah thylli hadien ba ka MLA ka NPP ka Agatha Sangma ka la iehnoh ia ka jinglong MLA ban ailad ia u para jongka, u Conrad ban iakhun ia ka elekshon khnang ba lada un jop, un bteng ban ialam ia ka sorkar.
U secretary ka UDP Garo Hills, u Utzol Sangma u la ong ba, “ka party ka la rai ban pyniakhun na South Tura bad u kyrtong uban sa pynbna un pynkyntdit ia kiba bun namar ba u dei uba pawnam bad don jingkyrmen ban rah ia ka thong”.
U la ong ba watla ka UDP ka don lang ha ka sorkar MDA hynrei kam don satia kano kano ka jingiateh bad ka NPP kaba ialam ia ka sorkar na ka bynta ka elekshon. “Kam don ka jingiateh ia ka elekshon hapdeng ka UDP bad ki paralok ka MDA ban nym iakhun ia ka elekshon na South Tura”, u la ong.
Haba kren jingkyrmen ban jop na South Tura, u nongialam ka UDP u la ong ba ka lah ban pynkyndit ia kiba bun ban iakhun na South Tura hynrei ka party ka don jingkyrmen ban jop namar ba ki seng riewlum ki dei ban synshar ia la ka jylla.
Ha kawei ka liang, dang shen u Senior Working President ka UDP u Bah Bindo M Lanong u la ong ba ka party kam pat rai halor kane hynrei ka sur na kiba bun ka long ba u Conrad u dei ban jop na South Tura.
“Wat la ngim pat rai, hynrei ka sur jong kiba bun, ka long ba u Conrad u dei ban jop na South Tura”, la ong u Bah Bindo.
Lah ban kdew ba ka UDP ka la rai ruh ban pyniakhun na ka bynta ka elekshon shiteng samoi na Ranikor hadien ba la iehnoh kam MLA u Martin M Danggo. Wat la ka party kam pat pynbna ia u kyrteng, hynrei u President ka UDP u Dr Donkupar Roy u la ong kham mynshwa, ba ka UDP kan pyniakhun beit da u Bah Pius Marwein uba la shah rem tang khyndiat vote ha kane ka elekshon ba dang shu dep.