Shillong: Ka long kaei kaei kaba sngewtynnad na ka bynta ki nongrep, namar ba nangne shakhmat kim hap shuh ban siew khajna halor u synsar lada ki pynkit ia une u mar rep sha ki iew ki hat.
Lah ban pynkynmaw ba dang ha ka 14 tarik u Jylliew 2019 ka Sorkar Jylla, ka la pynmih ia ka jingpynbna ban pyntip ba ka la ithuh ia u synsar kum u marrep ba la lait ban siew khajna da ki nongrep synsar haba pynkit ia une u mar rep bad iaid lyngba ka khyrdop lum khajna jong ka tnat Forest ka Sorkar Jylla lymne na ka khyrdop lum khajna jong ka Khasi Hills Autonomous District Council.
U Myntri ka tnat ka Rep ka Riang, u Bah Banteidor Lyngdoh, ha ka jingiakren bad ki lad pathai khubor mynta ka sngi, u la iathuh ba ka Sorkar Jylla ka la shim ia kane ka rai hadien ba ka Sorkar ka la mynjur ban wanrah ia ka jingpynkylla thymmai ha ka Schedule A1 bad A2 jong ka Guidelines na ka bynta ban rejistar bad pynmih ia ki mar rep khlaw kiba hap hapoh ka Agroforestry Plantation 2017, da kaba kynthup lang ia u synsar ha kane ka Schedule A1 bad A2 jong ka Guidelines.
Une u myntri ka rep ka riang ka Sorkar Jylla u la ong ba kane kan long ka khubor kaba bha sha ki paidbah nongrep synsar ka Jylla halor ka jingithuh jong ka Sorkar Jylla ia u synsar uba ju iaid iew bha ha ka jylla.
Ha kajuh ka por u la ai khublei ia Myntri Rangbah ka Jylla uba la shimkhia ia kane ka jingmyntoi jong ki nongrep.
Ai khublei kyrpang ia ka sorkar ba la shimkhia ia ka jing ud u paidbah bad to nang iai pyniar ia ki kti iarap bad kyrshan ia ki paidbah ba la jied ia phi.. Kum kine ki jait jngeh ba ki paidbah ki ia kynduh lada ka sorkar ka lah ban shimkhia kumne ia kiwei2 ruh ki jngeh ba ki paidbah ki shem jingeh kan long ka jngkyrkhu kaba khraw ia u paitbah ba im na ka rep ka riang.. kumne te hooid kein da leit thep vote ruh sngew shongnia hynrei te long kum ba leit thep vote tang pyn heh saipan iano re iano.