Shillong: Ka jingialang ka kynhun myntri ne cabinet myn hynnin ka sngi kala rai ban pynjari da ka synshar Administrator Rule (AR) ha Khasi Hills Autonomous District Council (KHADC).
Kham mynshwa, u Lat ka jylla u Tathagata Roy ula kyntait ia ka jingai jingmut ka sorkar ban pynjari da ka synshar Administrator rule bad ula mynjur ia ka jingthung Chief Executive Member (CEM) ia u bah Latiplang Kharkongor na ka United Democratic Forum (UDF).
Haba pyntip ia kane sha ki lad pathai khubor hadien ba la wai ka jingialang ka kynhun myntri ne cabinet myn hynnin ka sngi, u myntri rangbah ka jylla u Conrad Sangma ula ong ba hadien ba ka la don ka jingshong synjor ka synshar khadar, ka sorkar kala sngew dei ba ka lynti kaba bha tam, ka long ban pynjari da ka synshar Administrator Rule bad ia kane ka rai, yn phah sha u Lat ka jylla mardor.
“Namar ba ka la don ka jingsynjor ka synshar khadar ha KHADC, ka sorkar kala shim ia ka rai ba kaba bha tam ka long ban pynjari da ka Administrator Rule”, la ong u Conrad.
Ha ka jingshisha, ka sorkar kala phah mynshwa sha u Lat ban pynjari Administrator Rule hynrei u Lat u la kyntait bad kane ka dei ka sien kaba ar ba ka sorkar kan phah biang tang hapoh ar taiew eiei.
Lah ban kdew ba ka kynhun ka UDF ba ialam u bah Latiplang lem ki MDC ka Congress, katto katne na NPP bad ka PDF, kala pynkhyllem da ka jingiashah u chairman u bah Pynshngain N Syiem ia ka Executive Committee (EC) ka United Democratic Alliance (UDA) ba ialam da u bah Teinwel Dkhar.
Hynrei ka kynhun UDF jong u bah Latiplang kala kylla rit paid biang hadien ba u MDC ka Congress na Mairang u bah Batskhem Ryntathiang ula mih noh bad leit ai jingkyrshan ia ka UDA. Ka UDA ka don mynta 15 ngut katba ka UDF ka don 14 ngut bad u chairman bah Pynshngain ha ka ing kaba 29 ngut.
Hynrei haduh ar taiew mynta, u bah Latiplang um shym la lah ban thaw ia ka Executive Committee namar ba u Lat um shym la mynjur ia ki kyrteng jong ki 4 ngut ban long ki Executive Member ba la phah bad kumjuh ia ka Dy.CEM ka kong Grace Mary Kharpuri.
Kane kala pynlong ia u bah Latiplang ban ujor ruh sha ka High Court ka Meghalaya pyrshah ia ka ophis u Lat, ka tnad District Council Affairs (DCA) ka jylla, halor ka jingpynslem ban ai jingmynjur.
Phi don ban ong eiei?