Rai ka sorkar ban shimti, ia ki skul Deficit bym dei skul niam

Shillong, 9 Naitung:
Ka sorkar Meghala ya lyngba ka shithi jong u Director ka School Education and Literacy (No. DSEL/sec.NG/apptt/4/2013/2055) kaba la pynmih ha ka 02 tarik Naitung, 2013, ka la phah sha baroh ki Deficit Secondary/higher secondary school lyngba ki district school education officer ba ka don ka jingthmu ban shimti noh ia baroh ki defiict secondary bad higher secondary school kiba la pyniaid da ki skul bym dei niam hapoh kane ka jylla.
Kum ka jingsdang ka jingshimti ka sorkar (provincialisation) ia kine ki skul deficit, ka sorkar ka kwah ba kitei ki skul deficit ki dei ban ai jingtip noh sha ka sorkar ia ki sponsoring body, ka snem ba seng ia ki, ki jingdon ki nonghikai, nongtrei ka skul, ka jingdon jingem ne longtrai ka skul baroh sha ka sorkar, khnang ba ka sorkar kan ioh ban pyrkhat kham kloi halor kane ka kam.
Lah ruh ban pynkynmaw hangne ba ka Khasi Jaintia Deficit Teachers Association (KJDSTA) lem bad ka GHDSTEA ki ju dawa na ka por sha ka por na ka sorkar ba kan shimti noh ia ka kam hikai, khnang ban pynlait ia ki jingeh ba bun jait ba ki iakynduh man ka por kum ka jingbymsiew thikna ia ka tulop, ka medical reimbursement, ka penshon bad kiwei ba ka sorkar ka ju leh bein ia ki nonghikai. Ki nonghikai ki la dep iakynduh ruh ia u Union Minister ka Human Resources Development (HRD) u Dr Raju M Pallam ha New Delhi ha ka 11 tarik Nohprah 2012 bad ha Shillong ha u Jylliew 2013 ban pynsngew ia u halor kane ka jingeh jong ki nonghikai.