Rai ka sorkar, ban pynduh noh ïa ka Ranjeet Lal University Act, 2011

Shillong:Ka Sorkar Jylla lyngba ka Kynhun Myntri, ha ka sngi Palei, kala ai jingmynjur ïa ka jingtyrwa ban mynjur noh da ka Ordinance ban pynduh noh ïa ka Ranjeet Lal University Act, 2011.

Haba ïakren bad ki nongthoh khubor hadien ka jingïalang, u Myntri Rangbah Conrad K Sangma ula ong ba ka Ranjeet Lal University Act ka dei kaba la mynjur da ka Ïingdorbar Thaw Aiñ ka Jylla ha u snem 2011 hynrei na ki daw kiba bun, kat haduh u 2020, u Lat ka Jylla um pat ai jingmynjur satia ïa kane ka Aiñ.
Ha u snem 2020, ka jingmynjur jong u Lat kala wan ha u bnai Rymphang.

“Hynrei, naduh u Rymphang 2020 haduh mynta, ngim shym la ïohi satia ïa kano kano ka sienjam ba la shim da kane ka University,” ong u Conrad.

Ula bynrap, “Ka Private University Commission kaba ngi don bad kaba teh kyndon ïa ki University shimet, ka la thoh shithi la bunsien sha kane ka University ban pan jingtip ïa ka jinglong jingman ka kam ba ki trei hynrei kam shym la ai satia ka jubab kaba hun bad kumta hadien ba bud ïa ki kyndon treikam bapher bapher, ka Kynhun Myntri ka la mynjur ïa ka jingtyrwa ban mynjur noh da ka Ordinance ban pynduh noh ïa ka Act, 2011”.