Rai ka NERPF ban kyrshan, ia ka NDA ban ialam ka BJP

Shillong, 13 Jymmang:
Ka North East Regional Political Front (NERPF) ka la shim ia ka rai ban kyrshan ia ka NDA ban ialam da ka BJP ban thaw ia ka sorkar ha Delhi. Ia kane ka rai la shim ha ka jingialang kaba long hynne ka sngi ha Guwahati. Ka jingialang ka la thaw ruh ia ka prokram ban wanrah ia ki kam pynroi ia kane ka thain shatei lammihngi ka India bad ia ka Common Minimum Programme (CMP).
“Kane ka prokram bad ka common minimum programme kan long na ka bynta ki kam pynroi ban wanrah sha kane ka thain”, la ong u working president ka UDP u Bah Paul Lyngdoh  u la iathuh hadien ba la wai ka jingialang ka executive committee ka NERPF ha Guwahati ha kane ka sngi Hatmajai.
Katkum ka jingong u Bah Lyngdoh,  ki mat kin long na ka bynta ka roi ka par jong ka thain baroh kawei ban iasaid da kane ka kynhun na ka sorkar pdeng.
“Kane ka kynhun kan iai buddien ia ki mat kum ka jingpynbeit ia u pud u sam hadien ba la thaw ia ka sorkar thymmai ha Delhi” u la ong.
U Bah Lyngdoh u la ong ba ka kynhun ka la rai ruh ban iatreilang kum kawei ka kynhun ha kane ka thain bad kan leit ruh ban kyrshan ia ka NDA ban ialam da ka BJP.
“Ngi la ai bor ha u chairman u Neiphu Rio ban iakren bad ka NDA na ka bynta ka kynhun jong ngi”, la ong u Bah Paul.