Rai ka HSPDP, ban pyn don burom ia ki nong ialeh Hill State

Shillong: Ka Central Executive Committee jong ka party HSPDP, myn hynnin ka sngi, ka la shim ia ka rai ban kyrshan ia u bah Eugeneson Lyngdoh kyrtong ka UDP na ka 24-Mawphlang (ST) Assembly Konstitwensi ha kane ka ilekshon MLA shiteng samoi ka ban long ha ka 30 tarik mynta u bnai.

Haba ia dei bad ka 13-Mawryngkeng (ST) Assembly Konstitwensi ka party UDP ka khlem pynieng kyrtong bad ha 47-Rajabala, wat la ka UDP ka pynieng kyrtong, hynrei ka party HSPDP kam don briew, kumta ka jingong ban kyrshan ne ym kyrshan kam don ei ei ban ong, la ong u bah K P Pangniang president ka HSPDP.

Ka HSPDP ka kwah ban ia kynduh kum ka Regional Democratic Alliance (RDA) ban ia kynduh lang ban ia kren kumno ban iaid ha kane ka ilekshon shiteng samoi ban pynjop ia u kyrtong ka UDP na Mawphlang bad kane ka jingkyrshan ka long ban pyni ba ka HSPDP ka kwah ia ka jingiatylli ki seng riewlum.

Ha kane ka jingialang ka party ka la shim ia ka rai ban pyndon burom ia baroh kito ki dkhot kiba la ialeh ia ka Hills State Movement, naduh ka por jong ka APHLC bad ki jong ka party HSPDP, namar dei ma ki kiba la shah shitom ban shah set byndi ha Shillong bad Guwahati.

U bah Pangniang u la iathuh ba kane ka jingpyndon burom ia ki, ka long ban rakhe ia ka jingdap 53 snem ka party bad ka jingdap jong ka jylla 50 snem, kum ka party kam lah ban klet ia ki dkhot jong ka APHLC bad ka HSPDP, kiba la shah shitom bad aiti iala de na ka bynta ban pynioh ia ka jylla kaba pura kumba ka long mynta.

Haba ia dei bad ka jingiadawa ban ioh ia ka Khasi State,u bah Pangniang u la iathuh ba ka HSPDP kan ia treilang bad ka GSMC na garo Hills ba ki dawa ia la ka jong ka jylla Garo, kine ki ar tylli ki kynhun kin ia treilang ha kaba kin phah jingthoh sha ka sorkar pdeng ban dawa jylla kin ia soi lang.

U bah pangniang u la ong ba ia mynta ki don haduh 18 tylli ki kynhun ha ka Ri India kiba dawa jylla la ka jong bad ka jingdawa Khasi State bad garoland kala don lang hangta, ka GSMC bad ka HSPDP kin ia treilang ban ia dawa ia la ka jong ka jylla bad shen kin sa ia kynduh lang halor kane.