Rai ka EC JHADC, ban thung ia ka Committee halor ki dak Pnar

Jowai, 20 Iaiong:
Ki Nongialam jong ka Jaintia Students’ Union (JSU) hapoh ka jingialam u Presdent U Rikut n Parien ha kine ki khyndiat sngi bala dep kala ia kynduh biang ia u CEM jong ka JHADC ma Thombor shiwat ban pynkynmaw biang halor ki ar tylli ki mat jingdawa kiba la dawa naka JHADC  kata halor ka jingpynmih iaki Dak thoh Pnar (Jaintia) ba pura bad kumjuh halor ka jingbuh noh iaka Iew Die lang.
Ha kane ka jing iakynduh, na ka liang u CEM u la pynsngew hakhmat ki nongialam jongka JSU ba ka EC jongu kala dep shongpyrkhat bad iakren sani halor kine ki ar tylli ki mat bad u la ong ba ka EC kala dep thung ruh iaka Committee ba kyrpang naka bynta ban pynmih iaki Dak thoh ia kaba yn sa pynmih bad pynbna paidbah (Notify) shen khnang ba kan lah ban sdang noh iaka kam.
Ha kajuh ka por u CEM u la ong ruh ba ha kaba iadei bad ka Iew Die lang, ka Council kala mang katto katne ka Pisa naka bynta ban sdang ban shna ia kane ka iew die lang kum shi bynta ban pynkhlain shuh shuh iaka kamai kajih hapoh ka Ri Lum Jaintia.
Kumta halor kane ka bynta, na kaliang ka JSU kala pynpaw iaka jingsngewkmen halor kane ka jingshimkhia jongka Council bad ka pynpaw iaka jingiaroh ia kane ka EC kaba mynta khamtam eh ia u CEM namar ka jingshimkhia halor kine ki mat kiba donkam, bad ngi kyrmen ba ka Council kan iaid shakhmat khnang ba ka ri bad ka Jaitbynriew kan neh kan sah bad nangkiew haka roi ka par, ong ka kyrwoh khubor naka Union.