| Jowai: Ha ka Kyrwoh kaba la phah da u ma Lieh Sungoh na Mynsngat, la ong wat lada ka Elekshon sha ka Iingdorbar jong ka Jaintia Hills Autonomous District Council ym pat pynbna da ka sorkar lano kan long, hynrei ka Dorbar shnong Mynsngat kaba la long ha kane ka 16 tarik mynta u bnai ka la rai ban kyrshan ia u ma Pheinshwa Langlein MDC ba mynta, kum u Kyrtong MDC ha kane ka elekshon MDC ka ban long ha u snem 2019. U ma Pheinshwa Langlein MDC, haba kren ha kane ka sngi u la pynpaw ia ka jingsngewnguh ia ka Dorbar shnong Mynsngat kaba la kyrshan met bad mynsiem ia u ha kane ka san snem kaba la dep bad ka nangpynkmen shuh shuh ia u haba u la ioh ia kane ka jingkyrshan jong ka shnong sa ha kane ka elekshon MDC ka ban wan 2019. Ha ka juh ka por ha ka kyrwoh kaba la phah da u ma Lieh Sungoh la ong ba na ka liang u ma Langlein (MDC) u la ai ia ka Kaiphoit Treikam kyllum jong u kum u MDC ha kine ki san snem ha kaba kum u MDC, u la pyndonkam hok sha ki paidbah ia baroh ki Grant MDC kiba u la ioh na ka District Council bad kane ka jingpyndonkam hok jong u ia ki grant kiba u la ioh sha ki paidbah nongshong shnong jong ka Constituency, ka la pynkmen ia ki nong shong shnong jong ka Mynsngat bad ia ki nongshong shnong jong ka Constituency hi baroh kawei pynkut ka kyrwoh kaba la phah da u ma Lieh Sungoh na Mynsngat, West Jaintia Hills District. |