Rai ka dorbar Kur, ban khang shisyndon ia ka jing kylla jait

Shillong: U Bah K Ryntathiang, Chairman ka Steering Commitee jong ka Dorbar kur, mynta ka sngi u la iathuh ba kin pynlong biang ia ka jingialang paidbah ha ka 7 tarik u Nohprah 2019 ha ka Hall jong ka Bharat And Scout ha Laban. u bah Ryntathiang, u la khot lawer ia baroh ki nongkitkam jong, ki kur bapher bapher ba kin wan 5 ngut na kawei ka kur.

U bah H.Ryntathiang haba ia kren bad ki lad pathai khubor ha Shillong Press Club, u la ong ba ha kane ka sngi kin ia kren ia thir shaphang ki bill ki ba mih na ka KHADC kiba ktah ia ki Dorbar kur, ha kaba u ong ba ki Dorbar kur kin shah teh shah khum ha ka District Council.

Na ka liang u Chairman u la iathuh ba ha ka 3 tarik mynta u bnai, ki la dep pynlong ia ka jingialang ha kaba ki la ia kren ia ka jingpynkylla ia ka Lienage Act bad mynta na ka liang ka KHADC ki la dep ban mynjur ia ka Clan bill.

U Bah Ryntathiang, u ong “Na ka liang jong ngi, ngi la mynjur ia ka Clan Bill ka ba la wanrah da H.S Shylla ha ka por ba u dang long kum u CEM hynrei ryngkat bad ki katto katne ki jingpynkylla ha ka” bad u ong shuh shuh ba ka bill ba la wan rah da u H.S Shylla ha ka por ba u dang long kum u CEM ka KHADC ka don ka jingiatyngkhuh bad ka jingktah ia ki kur, hynrei mynta ka kynti ki wan ban pashat jingmut ia ki bill jong ka District Council bad la tyrsat ia ki katto katne ki jingpynbha.

Kine ki jing pynbha ki long hadien ba la bishar bha ia ka jinglong jingman ka rukom pyniaid ia ki kur ki jait ha Khasi Jaintia.

Ki khyndiat ki jingpynkylla, ki long kum ka central excutive dorbar, ha kaba ki la pynkylla sha ka central excutive body, namar ki don ha ki jingialang jong ki kur kiba ai da central excutive commitee lane da ka Central excutive council.

Ha ka bill ka KHADC ka don ka “duh ing” hynrei mynta ngi la ai noh da ka “iing iap duh” ia ka ing ba ym don khun kynthei ban ioh pateng.

Kaba batai shaphang u Khasi kat kum ka bill khasi u dei dei u Khasi, Pnar, Bhoi,War bad Lyngngam,hynrei la pynbeit ba U Khasi u dei u Khynriam, uPnar,u Bhoi, u War bad u Lyngngam.

Kawei ka bynta ka “shongkha khleh” (Mixed Marriage)jong u Shynrang khasi ne ka kynthei Khasi bad kiwei pat ki jait bynriew ki bym dei u khasi.

Nangta la iathuh ba rangbah kur ki dei ki khlieh Rangbah kur kiba lajied da ka dorbar jongka kur hi ban mih khmat ia ka kur. Ki kpoh ki pynlong ia ka kur bad khnang ban ym ktah ia ki rangbah jong ka kpoh, la la pynbud da u “Knii Rangbah” kiba la jied da ki kpoh hapoh ka kur.

Nangta la pynrung ruh ia ka ktien “Sang” kiba ia shongkha shikur lane para kpa kin long ka sang bad ka “Tangjait” ka dei beit tang ia ki khasi tribe hi.

Ia ki rukom trei kam jong ki dorbar kur kan long tang ban da ioh ia ki jingmynjur tang na dorbar kur.Halor ka jing weng jong u rangbah kur kadei tang ka dorbar kur hi ka ba lah ban weng ia u.

Ka dorbar kur, ka kren shai ruh ban khang shi syndon ia ka jingpynkylla jait bad nangta la bthah ruh ba ki kur Lyngdoh bad Syiem ki dei ban ai da pura ia ki ne ki jait ym dei tang ban ai tang Lyngdoh ne Syiem bad la rai ruh ba lada ka long kmie ka la bud ia ki riti distur jong kiwei ki jait bynriew kin ym lah shuh ban long ki khasi.