Rai ka dorbar Andhra Pradesh, ban thung kam 75 percent ia ki trai jylla ha ki kompeni shimet

Ka Andhra Pradesh, ka la rai ba baroh ki kam jong ki kynhun shimet lane ki kompeni bar Jylla, ba kin ai kam haduh 75 percent ia ki trai Jylla bad ia katei la mynjur, da ka dorbar Jylla hynnin ka sngi, ia ka ain, kaba la tip kum ka Andhra Pradesh Employment of Local Candidates in Industries/Factories Act, 2019, kaba ai bhah haduh 75 percent ia ki trai Jylla, ha ki karkhana, ki jaka tei kam lajong bad ha ki kompeni kiba dei hapdeng ka sorkar bad kiwei de ki kompeni kiba nabar.

Katei ka ain, ka kren shai ba lada ka kompeni kam don ia kito ki trai shnong kiba tbit, ka hap ban hikai ia ki, ha ryngkat ka jing ia treilang ka sorkar Jylla bad ha kane ka dur, ki kompeni, kim lah shuh ban rieh tngen, da kaba ong, ba kim don ia ki trai shnong kiba lah ban trei ia kino kino ki kam.