Rai ka Congress Nongstoiñ ia ka tiket sha u Dr. Pariong

Shillong, 26 Risaw:
Ka Nongstoiñ Block Congress Committee ka la rai tylli kawei ban ai ia ka tiket ha kane ka elekshon MLA shiteng samoi sha u Dr. Adviser Pariong napdeng ki lai ngut ki kyrtong kiba la pan tiket.
Ha ka jingia kren bad u President ka Block Congress ha Nongstoiñ u bah Albinus Kharbani u la ong ba ka Block Nong stoiñ ka la mynjur ia ka kyrteng u Dr.Pariong ban ai tiket, hynrei dang hap pat ban rah sha ka District bad ka State ba kan myn jur ia ka kyrteng jong u.
Katkum ka jingthuh utei u President ka Congress na Nongstoiñ u la ong ba baroh lai tylli ki kyrteng jong ki kyrtong ba pan tiket yn pynpoi ha ka jingialang jong ka District ka ban long mynta ka miet bad kumjuh ruh ha ka jingialang jong ka State ka ban long lashai ka sngi. Hynrei u la ong ba ha kaba iadei bad ka Nongstoiñ Konstitwensi baroh kawei ka sur ka la mynjur ban ai ha u Dr.Pariong bad kiwei pat ki kyrtong ba kynthup ia u ba Gabriel Wahlang bad u bah N.Nongdkhar ki la mynjur ban ai ka jingiatreilang ban kyrshan ia utei u kyrtong ba ka Congress ha Nongstoiñ ka la ibit.
Haba ia kren bad u Dr. Adviser Pariong pat u la ong ba haduh mynta ruh um pat kwah ban ong eiei namarba ka kam kam pat poi sha kaba kut , hynrei u la kubur ba napdeng baroh lai ngut ki kyrtong ka Nongstoiñ Block ka la buh ia ka kyrteng jong u hakhmat hynrei dang hap ban iaid lynti pat sha ka District bad sha ka State ba kan pynbna paidbah iano ka ibit ban pyniakhun ha kane ka elekshon shiteng samoi. Baroh ki kyrteng jong ki lai ngut ki kyrtong ba pan tiket kata u Dr.Pariong, bah Gabriel Wahlang bad u bah N.Nongdkhar mynta ka la poi ha District bad yn shim ruh ia ka rai mynta hi ka miet.
Hynrei katkum ka tyllong khubor ba la ioh lum la ong ba katei ka jingialang jong ka District bad ka State ka long tang kum ka jingiaid lynti hynrei kan ym don shuh ka jingkylla da kumwei pat namarba ka Nongstoiñ ka la mon palat ia u Dr.Adviser Pariong bad ba katkum ka jingthoh kaba ka Congress na Nongstoiñ ka ai ka pynpaw ba la mynjur tylli da baroh ki dkhot katei ka seng ban ai ia ka tiket sha u Dr.Pariong.