Rai ban leit kyrshan Kyrtong Congress ki nongialam bad nongkyrshan ka UCPF, khylliap syndon ia ka Lama ka UCPF

Nongpoh, 16 K’lyngkot: Mynta ka sngi, ka la don ka jingialang hapdeng ki nongialam lem bad ki nongkyrshan ka Umroi Constituency Progressive Forum (UCPF), ia kaba ki la pynlong ha kawei ka jaka ha Umroi Umdohbyrthih bad ha katei ka jingialang, ki la shim ia ka rai ban pynduh pyndam noh ia ka UCPF ha Umroi Constituency bad ba ki la rai ban leit ai jingkyrshan noh ia u Bah M.D Syiem, Kyrtong MDC ka Congress na Umroi Constituency.

Ha katei ka jingialang kaba la long ha Umdohbyrthih, la sakhi da ka jingdon u Bah Pynskhemlang Sohtun, President ka UCPF, u Bah Remius Kharsati, Vice-President, u Bah Forstar Sohiong, General Secretary lem bad shibun kiwei pat ki nongialam bad nongkyrshan ka UCPF, ha kaba lyngba jong katei ka jingialang, ki la shim ia kawei ka rai ban leit pyniasoh noh sha ka Congress bad ba kin leit ai jingkyrshan noh ia u Bah M.D Syiem.

U Bah Pynskhemlang Sohtun, haba kren sha ki lad pathaikhubor, u la ong ba ka nongrim kaba la pynlong ia ki ba kin leit kyrshan noh sha u Kyrtong Congress, ka dei namar ba ki la shah buh jingkylli palat ha ki paidbah ha ka por ba ki leit ban ialap Ilekshon, ha kaba ka jingkylli na ki paidbah, ka long ba shano u Kyrtong ka UCPF un leit kyrshan ne iasoh party, haba u la jop ba katei ka Constituency.

Shuh shuh, haba u batai bha, u la ong ruh ba kum ki nongialam ka UCPF, haba ki la iohsngew ia kaba kum katei ka sur na ki paidbah, ki la pynlong ia ka jingialang la katto katne sien hapdeng ki para nongkitkam bad nongkyrshan ka UCPF bad ha kiba kum kita ki jingialang, la mih ka sur ba lada long kumno kumno ruh, la dei ban leit ai jingkyrshan noh sha u Bah M.D Syiem, u briew uba la ïoh ia ka ticket ban iakhun na ka Party Congress.

Namarkata, lyngba ka jingkren jong utei u nongialam ka UCPF, uba la kren ha ka sur jong ka jingiarailang na baroh ki nongialam bad nongkyrshan ka UCPF, kiba la rai ban kyrshan noh sha ka Congress, la ong ba ka jingrung paidbah sha ka Party Congress, kan long ha ka 21 tarik mynta u bnai ha madan Umroi bad lyngba ka jingkren jong u, la kyrpad ia kiwei ki nongkyrshan ba kin wan sakhi ha katei ka sngi, ba kan don ka jingrung paidbah sha ka Party Congress bad ruh kaba long ruh kum shibynta ban pynithuh paidbah ia u Kyrtong ka Congress na Umroi Constituency.