Rai 48 tylli ki Unit HSPDP, ban pynieng ia u khun ksiew jong u Wikliffe

Nongstoin:Ki 48 tylli ki Unit jong ka HSPDP kiba la dep ban iehnoh kam na ka HSPDP myn haka sngi saitjain jong ka taiew ki la shim ia ka rai ban pynieng ia u Bah Bobby Kharshandi kum u kyrtong shimet na 32-Nongstoin Constituency ha kane ka election 2023.

Kitei ki 48 tylli ki unit kiba dei ki nongkitkam ba radbah jong ka HSPDP ki la pynpaw iaka jing sngew bitar hadien ba ka HSPDP sengkmie kaba la ialam da u Bah KP Pangniang kim shym la burom ia ka rai jong ki nongialam jong ki primary unit kiba don hapoh Nongstoin constituency ha kaba iaka ticket kaba dei ban ai sha u Bah Bobby Kharshandi la ai pynban sha u Sanjied Shangrit.

U Bah K.Lyngdoh u President barim jong ka HSPDP Nongstoin Area ha ka jingialang kaba la long hapoh Rikhasi Free Morning School myn haka sngi saitjain u la iathuh ba nakaliang jong ka HSPDP Sengkmie ka la rai ban pynwai noh ia baroh ki unit kiba la dep ban lum da ki nongialam jong ka party bad da kine kijuh ki dkhot jong kitei ki unit kin ai ka jingkyrshan sha u Bah Bobby Kharshandi.

U la ong ruh ba dei tang u Bah Bobby Kharshandi u ba la sdang ban lum ban lang ha ka por bay m pat don kiba bna eiei shaphang ka election bad u la sdang ban iaid naduh u snem 2019 da kaba pynthymmai iaki nongkitkam bad ban shna thymmai iaki unit kiba ym shym la treikam shuh bad haka jingpeit jong ki kum ki nongkyrshan jong ka HSPDP ba dei tang ma u uba lah ban the song biang hynrei namar ba ki nongialam jong ka party na sengkmie kim kwah satia ba kane ka party kan dang khie rasong biang na Nongstoin kumta kim shym la burom iaka rai jong u paitbah hynrei ki la kyntait syndon ban ai ia u iaka ticket.

Haba kren ha katei ka sngi na ka liang jong u Bah Bobby, u la iathuh, ba u la sdang ban iaid bad ban trei ia katei ka kam naduh u snem 2019 ha kaba u la iohi iaki jingeh ba ki paitbah jong ka Nongstoin ki iakynduh jingeh, ha kaba u la buh iaka thong ba ka mat kaba nyngkong eh jong u ka long ban pynduh iaka jingduk jong ki paitbah ka thain Nongstoin bad kam thew tang ha ka jingduk haka bam hynrei ka jingduk ha ki liang baroh.

U la iathuh ba u la iadon bynta bad ki paitbah ka thain Nongstoin ha kiba bun ki bynta bad kaba kham kongsan eh ka long ha ki 2 snem kiba ki paitbah jong ka thain Nongstoin ki iakynduh mawsiang lyngba ka jingwan jong ka khlam bad ka jingkhang dam ha kaba da ki spah tylli ki longing kiba u la iadon bynta ha ki por jong ka khim khait.
U la iathuh ba um dei shuh u nongwei ha Nongstoin ha kaba u wan na ka longing jong ki syiem bad kiba khraw ba tri jong ka nongstoin ha kaba u la kam ruh ba u dei u khun ksiew jong u Syiem Nian bad u khun ksiew jong u Paiem Wikliffe, kumta kum ba ki longdien jong u kiba dei ki syiem ba donnam jong ka Nongstoin ma u ruh un bud bad ban pynim ia ki mati kiba ki paieid ki parad jong u ki la sdang.