Rah suk ka Congress, JD(S) ha ki elekshon shiteng samoi ha Karnataka

Ki seng synrop jong ka sorkar ha Karnataka, ka la jop suk ia 4 ngut ki dkhot, ha ka elekshon shiteng samoi sha lok Sabbha bad sha ka dorbar Jylla, kaba la pynlong ha ka sngi saitjain ba ladep.

Ha ka jingniew vote mynta ka sngi, ka BJP, ka jop ha Shivamogga Parliament seat, kaba la shim ba ka dei ka ktem jong u nongialam jong katei ka seng ha katei ka Jylla, U B S Yeddyurappa. U khun jongu, U B Y Raghavendra, ula tam da 51,000 ia U Madhu Bangarappa jong ka seng JD(S), katba ka JD(S), ka jop ia ka Ballari, katba ka Congress, ka jop ia ka Mandya.

Ha ki elekshon dorbar Jylla ha Ramanagaram, ka kurim jong U H D Kumaraswamy, ka Anitha, ka la jop da 1,09,137 pyrshah ia u kandidet ka seng BJP, U L Chandrashekar, uba la weng noh ialade na ka jing iakhun.

Ha Jamkhandi, u kandidet ka seng Congress, U Anand Nyamgouda, ula pynliem ia u kandidet ka seng BJP, U Srikant Kulkarni da 39,480 vote, ha kaba la shim ba katei ka dei ka vote sngewlem ia u, namar ka jingia noh jong u kpa jongu, uba dei U MLA jong katei ka thain, U Siddu Nyamagouda, uba la iap ha ka jing tyngkhuh kali.

U VS Ugruppa jong ka seng Congress bad U LR Shivaramegowda jong ka seng JD(S), ki la jop ia ka Ballari bad ka Mandya Lok Sabha, da ka jing ioh vote kaba 2,43,161 bad 3,24,943 vote.

Da ka jingjop mynta ka sngi, ka Congress-JD(S), ki la kiew sha ka 120ngut ki dkhot ha ka iing dorbar, kaba don 224ngut, katba ka BJP ka don 104ngut ki dkhot.

– Advertisement –