Rah shwa ha iing dorbar, ha shwa ban ia soi soskular bad ka Assam, ong ka KHNAM

Shillong:Na ka liang jong ka tnat Youth Wing jong ka KHNAM, ka pynsngew ba haba ka sorkar jylla, ka la sdang sa ia ka sien kaba ar, jong ka jingiapynbeit pud hap deng ka Assam bad Meghalaya, kumta ka seng, ka sngewdei ban kren shai halor kane ka phang, ba ha shwa ka jingsoi ia ka MUA-2 hapdeng ki ar ngut ki myntri rangbah bad kata ka long, ba ka sorkar, ka dei ban rah ha iing dorbar jylla, halor ka jingthmu jongka, ha shwa ban ia soi pynbeit pud bad ka Assam.

Ka seng, ka ong, ba ba lada mih ki jingleh bakla lane ka jingleh donbor bad ka jingbymhun jong ki paidbah, ka sorkar kam lah shuh ban ong, ba khlem ai jingmut ha shwa ban soi.

Ka seng ka dawa ba ka sorkar ka dei ban wanrah ha ka iing dorbar thaw ain jong ka jylla, ia ka kaiphot jong ki regional committee shwa ban poi sha ka MoU, khnang ban kiar na ki jingkynrum kynram bad la ong, ba lada donkam ban khot da ka dorbar ba kyrpang ruh, ia ka kaiphot dei beit ban iatai shwa haduh ba poi sha ka jingsngewthuh bad jinghun jong baroh.