Rah plakad ki khar metor ia ki ophisar, ba surbe ia ka them Iewmawlong

Shillong: Myn hynnin ka sngi, katba ki ophisar ka Directorate of Land Records and Survey, ka Shillong Municipal Board (SMB) bad ka Hima Mylliem, ki la leit ban jurip ban surbe ia ka jaka ha them Iewmawlong, ki khar metor kynthup ki kynthei bad shynrang ki la iamih na jaka sah ryngkat ka jingthoh plakad ban pynpaw pyrshah ia ka jingthmu ka sorkar ban pynkynriah sha kawei pat ka jaka na katei kaba ki don mynta.

Ka kynhun jong ki ophisar na kine ki tnad, ki la sdang ban surbe ia katei ka jaka hadien ba ka High Level Committee (HLC), ka la bthah ia ki ban pyndep hapoh shiphew sngi.
Ha ka por kumba 10 baje mynstep ha ka por ba la poi ki ophisar ka SMB bad ka Land Records & Survey, ryngkat ki myntri ka Hima Mylliem, la mih shi kynhun ki longkmie na katei ka jaka ryngkat bad ki plakad ba la thoh pyrshah ia ka jingthmu jong ka sorkar jylla ban pynkynriah ia ki na katei ka jaka, hynrei kane ka jingmih jong ki kam shym la pynthut pat ia ka jingthew jingwoh ka Land Records & Survey, namar ba la pahara bha ia kane ka jaka da ki magistrate bad pulit.
Kine ki khar metor kiba wan shakhmat ryngkat ka plakad ki dei ki kynthei katba ki shynrang ki don shadien. Ia ka plakad la thoh da ka ktien phareng, “Ngi pyrshah ia ka jingthmu ka sorkar ban pynkynriah shawei”, bad kiwei.
Ki rah plakad ha katei ka jaka tangba kim shym la pynmih sur hadien ba ka majistor ka Kong I Majaw, ka la ong ba kim dei ban halla.
Ia ka jingjurip bad ka jingthew jingwoh ia katei ka jaka la leh hapdeng ka jingpahara kaba jur da ki pulit bad ki CRPF khnang ban nym don kano ka no ka jingpynthut.
Na ka liang ka Director ka tnat Land Records & Survey, ka Kong I Mawlong ka la ong ba kane ka jingjurip kan neh kumba ar ne lai sngi bad hadien ka jingioh ia ka jingkhein bad ka map jong ki jaka ba la peit da ka Shillong Municipal Board (SMB) bad ka Hima Mylliem, na ka liang ka tnat kan sa aiti noh ia ka kaiphod sha ka HLC, bad ka la ong ba ia ka kaiphod yn ai ha shwa ka por ba la buh da ka HLC.