Rah ki samla Arunachal, Meghalaya ha ka jing iakob shad hiphop ha Shillong

Ka Breezer Vivid Shuffle ka la pynlong ia ka jingiakop ia ka Nation’s Biggest Hip-Hop Competition ha Shillong ha ka 13 tarik Naitung 2019. Kane ka dei ka sien kaba ar ban pynlong ia kane ka jingiakop.
Ha kane ka jing iakop U Techi Gromb na ka Jylla Arunachal Pradesh u la long u lahduh ha rynsan iakop shad HipHop bad u Anil Chetri na Meghalaya,u ba la wan ba ar ki la shah jied ban mihkhmat ia ka thaiñ Shatei Lammihngi ban leit mihkhmat ha ka rynsan iakop shad HipHop ha ka kylla iakhun phainal ka ban sa long ha ka nongbah Mumbai ha u Nailur 2019.
Ha ka jingiakren bad ki lad pathai khubor myn hynnin ka sngi saitjaiñ kine ki ar ngut kiba la jop ha kane ka rynsan iakop, ki la pynpaw ba kim shym ioh satia ia kano kano ka jingshah hikai kaba kyrpang, hynrei kane ka jingshad HipHop ka dei kaba ki don hi nalade bad kaba ki ju sngewtynnad ia kane ka rukom shad ha ka jingim jong ki.

U Techi Gromb, u la ong, “Nga ju juh hikai shad hi ha la iing bad ha dien ba nga la ioh jingtip ba kan don kane ka jingiakop shad nga la thep kyrteng bad ngam shym la poi pyrkhat ba ngan poi sha ka jingjop ha kane ka jingiakhun,” bad bynrap, “Ia mynta hi nga dang pynkhreh bha ialade ban iakhun pat sa ha ka phainal ka ban long ha Mumbai.”

U la iathuh ba kum kane ka jingshad ha ka Jylla Arunachal Pradesh kam pat don bad iathuh ruh u shu hikai hi ha la iing da kaba pyrthuh bud da kaba peit na Television.
Na ka liang jong u Anil Chetri na ka jylla Meghalaya u la ong ba kane ka jingshad ka la pawnam bha ha nongbah Shillong, bad iathuh ruh ba tang shu ioh jingtip u la pan jingbit na ki kmie ki kpa ban leit iashim bynta ha kane ka rynsan iakop da ka jingwan synran lang jong u hynmen.

Katba ha ka jingiakop shad Popping, la jop da u Jatin Karbar na ka nongbah Guargoan.
Une u samla uba dei ruh uba la kha bad la heh la san ha nongbah Shillong u la ong ba um lah satia ban klet ia ka nongbah Shillong kaba u la heh la san bad hadien ba la ioh jingtip halor kane ka jingiakop u la wan ban iashim bynta da ka jingkhmihlynti ban ioh rah ia ka nam jop.
Na ka liang u Director jong ka Ministry Dance u Satpir Singh u la iathuh ba ka Shillong kam dei tang ka sor kaba ki briew ki ieid ia ki sur jingrwai, hynrei u don pat kawei pat ka jingangnud ban pynlong ruh ia kane ka nongbah Shillong kum ka nongbah kaba pawnam pat ha ka shad.