Rah ki MLA ka Congress ia ka jingduna bam bad ka jingkyrduh ka dohmasi ha ka jylla

Shillong: Ha ka sngi ba lai jong ka Dorbar Synrai ka ïingdorbar thawaiñ kata ha ka 14 tarik u bnai Nailur 2021, u Bah George Lyngdoh u ba dei u MLA ka Congress na Umroi Constituency u la rah ia ka mat ha kaba iadei bad ka jingduna bam ha ka jylla bad ka jingshem jingeh ban wan poi ki masi sha kane ka jylla naduh ba la wan lynshop ka khlam Covid-19 ha ka jylla bad ba la shim bynta lang ruh da u nongialam jong ka liang pyrshah u Dr Mukul Sangma, ka Dr Ampareen Lyngdoh, u Bah Mohendro Rapsang, u Bah Charles Pyngrope, u Bah Mayralborn Syiem bad u Bah Himanta M Shangpliang ban iathir halor kane ka mat.

U Bah HM Shangpliang u la kren hapoh ka ïing dorbar thawaiñ halor ka jingduna ka bam hapoh ka jylla naduh ba la wan ka khlam Covid-19 ha u snem 2020 bad khamtam eh ka jingkyrduh ka jingwan poi jong ka dohmasi sha kane ka jylla. Haba kren sha ki lad pathai khubor hadien ka Dorbar Synrai, u Bah M Shangpliang u la ong, ba ynda la wad bniah la lap ba kumba 25 hajar ton ka dohmasi ka lut shisnem ha ka jylla Meghalaya bad u Bah HM Shangpliang u la ong ba ia kita ki masi baroh ki dei ban wan na shabar jong ka jylla Meghalaya.

U Bah HM Shangpliang u la ong ruh ba kat haduh u bnai Nailar 2021, ki nongthied masi ki khlem shem kano kano ka jingeh hynrei naduh ba la pynwan ia ka aiñ pyrkhing shalan masi hapoh ka jylla Assam kaba la tip kum ka Assam Cattle Protection Act 2021 ka la buh jingjynjar bha ia ki nongthied masi ka jylla Meghalaya ba kin pyniaid ia ki masi lyngba ka jylla Assam bad ka daw ka long ba ha katei ka aiñ ki don katto katne ki jingteh pyrkhing bad ki jinghap ban siew pisa lada pyniaid ia ki masi lyngba ka jylla Assam bad dei ia katei ka mat ba u Bah HM Shanpliang u la rah hapoh ka ïingdorbar thawaiñ.

U Bah HM Shangpliang u la dawa na u Myntri Rangbah ka jylla, u Conrad K Sangma ba u dei ban pynbeit mardor ia kane ka jingeh bad u Myntri Rangbah ka jylla Assam, u Himanta Biswa Sarma khnang ba ki nongkhaïi masi ka jylla Meghalaya kiba leit thied masi na shabar jong ka jylla kin nym mad jingeh hynrei lada ym lah ban pynbeit kan don ka jingshah pynjynjar ha lynti ha syngkieñ lada pyniaid ia ki masi lyngba ka jylla Assam.