Shillong: Ha ka final jong ka Meghalaya Cricket Association’s Inter District U-19 Girls Cricket Tournament, ka West Khasi Hills District Cricket Association ka la jop da 28 run pyrshah ia ka Tura District Cricket Association ba la ialeh ha Nongstoin mynnin ka sngi.
Hadien ba la jop ia ka toss ka WKH ka la jied ban tied shuwa bad la lam khmat ia kane ka kynhun da 51 run na ka Dubleen D Nengnong ban kynjoh sha ka 136/3 ha ki 20 over. Na ki lai ngut ki wicket ba la hap ar ngut la shim da ka Sanchisa Sangma 2/28 bad iwei pat la shim da ka Awesa G Momin 1/22.
Ha ka jingpynphai ka Sanchisa ka la long kawei na ki player ban synniang bun run na ka bynta ka Tura ha kaba kane ka kynhun ka la lah ban kynjoh sha ka 108/2. Ka Sanchisa kaba la lah ban tied 86 ka la dei ka sien kaba lai ba kan lah ban kynjoh palat ia ka half century bad da kane ka la ioh ban khur ia ka nam Player of the Tournament. Da ka rukom kawang biang pa biang jong ka WKH ka la lah ban teh lakam ia ka rukom kamai jong ka Tura kaba hapoh ka run rate kaba ki donkam.Kiwei pat kiba la ioh ban khur ia ki khusnam ki kynthup ia ka Nengnong kum ka Player of the match na WKH, ka Highest wicket Taker da khyndai ngut kata ka Emisakani Warjri kaba na WKH, na East Khasi Hills kaba la ioh ia ka Best wicketkeeper ka dei ka Monica Lyngdoh bad ia ka nam Most Promising Player la ioh da ka Fenny Nongrum na WKH. Nalor kane ka Sanchisa kaba la ioh ia ka Player of the Tournament ka dei ruh kawei kaba la lah ban kamai run bun da 256 bad kumjuh ruh kaba la ioh ban pynkhyllem 4 ngut ki wicket ha kane ka tournament.
U kongsan uba la wan ban sakhi ha kane ka sngi pynkut ia kane ka Tournament u dei u MLA ka Nongstoin u Shri Macmillan Byrsat. Kiwei pat ki kynrem ki lyndan kiba la don lang ha kane ka sngi ki kynthup ia u Vice President ka MCA u Dipul Ryntathiang, u Secretary ka MCA u Gideon Kharkongor, u Joint Secretary ka MCA u Chiang D Shira bad u Treasurer ka MCA u Drubajyoti Thakuria.
Phi don ban ong eiei?