Nongpoh: Ka Umtyrkhang Sports Club ka la ioh ban rah ia ka namlahduh ha ka 1st Maitshaphrang Knock-out Football Tournament 2018-2019, hadien ba ka la lah ban pynliem noh pyrshah ia ka Umlaper Sports Club da 2-1, ha ka jingiakhun phainal kaba la long ha Madan ialehkai ka shnong Umlaper ha Ri Bhoi.
Ia katei ka lympung ialehkai kaba la pynlong da ka KSU Umlaper Unit, la leit ban pynhap pyrda da u Samla Alexius Narleng, Vice-President ka KSU ha Ri Bhoi kum u kongsan, ha ryngkat ka jingdonlang kiwei ki riew rangbah kiba kynthup ia u Samla Henry Mukhim, President ka KSU Umlaper Unit, u Bah Aversal Khymdeit, Rangbah shnong ka Umlaper, u Bah Jwes Umbah lem bad kiwei ki riew rangbah jong katei ka thain.
Haba pynkut ia katei ka lympung ialehkai, la ioh ruh ia ka jinngkren na u samla Alexius Narleng, ha kaba u la pynpaw ia ka jingkmen ban iohi ba ki para dkhot ka seng ki la lah ban pynlong ia kaba kum katei ka lympung ialehkai, kaba long ruh kum shibynta ban kyntiew ia ka sap ialehkai phutbol ki khun samla ha katei ka thain.
Ha kajuh ruh ka por, u la ai ia ki kyntien kyrkhu kyrdoh bad kyntu ruh ia ki nongialam jong katei ka Unit ba kidei ban nangiaid shakhmat ban iai pynlong ia kiba kum kitei ki jait lympung, khang ba kan kyntiew ia ki khun samla kiba don ia ka sap ha ki kam ialehkai.
La pynkut ia katei ka lympung ialehkai, da kaba sam ia ki khusnam sha ka kynhun kaba la ioh ban rah ia ka nam lahduh bad ia kaba shah rem ruh kumjuh, nalor kata la sam ruh ia ki khusnam shimet sha kito ki rangialehkai kiba la lah ban ialehkai bha ha katei ka lympung.