Nongpoh: Haba kut noh ka lympung ialehkai phutbol kaba la pynlong da ka Umsning Sport & Cultural Club (US&CC) ha madan Patarim Umsning, ka Thad Football Club, ka la ioh ban rah ia ka namlahduh, kata hadien ba ka la lah ban pynliem noh pyrshah ia ka Umran Dairy Football Club da 1-0.
La sakhi ia katei ka phainal, da ka jingdon u Bah Rayonald Kharkamni, President ka Ri Bhoi Cricket Association kum u kongsan, nangta u Samla James Mawphniang, General Secretary ka KSU ha Ri Bhoi kum u symbud kongsan, ha ryngkat ka jingdon kiwei de ki riew rangbah bad ki seng longkmie na ka thian Umsning.
Ka Thad FC kaba la rah ia ka namlahduh, ka la khur ia ka song pisa kaba T. 50 hajar lem bad ka Trophy, katba ka Umran Dairy kaba la shah rem ha ka phainal, ka la khur ia ka song pisa kaba T. 20 hajar bad Trophy.
Nalor ka khusnam sha kitei ki kynhun, na ka liang ki nongpyniaid jong katei ka lympung, ki la sam ruh ia ki khusnam shimet, ha kaba ia ka nam Best player la ioh da u Badondor Marbaniang, ia ka nam Top scorer ia ioh da u samla Ricky Makdoh bad ia ka nam Best Goalkeeper, la ioh da u Shobal Syngkli.
Phi don ban ong eiei?