Shillong: Ka samla Tanvi Raksam Marak (20) ka la rah ia ka khusnam lahduh jong ka Miss Meghalaya 2019 ba la pynlong da ka Ka Meghalaya Tourism Youth Development Society (MTYDS) ryngkat ka jingiasnohkti lang bad ka ‘Glamanand Supermodel India’ ha kane ka sngi Saitjain ha shnong Bakur, Dawki.
Ia kane ka jingiakop thei bhabriew, la pynlong biang hadien 21 snem. Ka Marak ka la rah ia ka nam napdeng ki 23 ngut ki thei bhabriew ka jylla kiba iakhun ia kane ka nam.
Ki nongiashim bynta na ka bynta kane ka nam thei bhabriew ki don haduh 23 ngut bad napdeng jong kine, kaTanvi Raksam Marak ka la ioh ia ka nam lah duh ban deng ia ka pansngiat ryngkat bad ka khusnam pisa ba T.1 lak, bud sa ka Sanwaka Surong ha ka kyrdan 1st runner’s up bad ka Nazareen Kharubon ha ka kyrdan 2nd runners’s up .
Ki ar ngut ki nam tam na kane ka rynsan kin ioh ban iakhun ha ki rynsan ba heh jong ka ri India, kum ka ‘Miss India Earth, 2019’ bad ‘Miss International, 2019’ ban sa long ha Mumbai bad Delhi.
Ia kine ki thei bhabriew ka Meghalaya la wan ban bishar da 6 ngut ki ‘riew shemphang ha kane ka kam ba kynthup ia ka Miss India Earth, 2018, ka Deepika Vaid bad u Amjad Khan Pathan uba dei u director ka Glamanand Supermodel India.
Na ka liang u Bah Daniel Khongsit uba dei Waheh shong ka Bakur bad kumjuh uwei na ki nongialam ka MTYDS, u la ai khublei ia baroh ki nong iashim bynta bad khamtam ia ki hajar ngut paidbah kiba la ai ka jingkyrshan da kaba sakhi ia kane ka jingiakob kaba jop.
Ha kane ka jingiakhun u Myntri ka sorkar jylla, u Bah Lahkmen Rymbui u la long u Kongsan bad u la pynbna ruh ban ai jingiarap T.5 lak ha ka jingpynlong biang ia kane ka lympung ha u snem ban wan.
Phi don ban ong eiei?