Nongpoh: Ha kaba pynkut noh ia ka U-16 Open Invitation Football Tournament 2019 ka lympung ialehkai kaba la pynlong da ka Ri Bhoi District Sports Association (RBDSA) ha Madan Umdihar, ka Rongdop Sports Club, ka la ioh ban rah syndon ia nam lahduh, hadien ba ka la lah ban pynliem noh pyrshah ia ka Umdihar SC da 3-2 kol, ha ka jingiakhun kaba la poi shaduh ka Tie Breaker.
La pynkut ia katei ka lympung ialehkai, da ka jingdon u Bah Mayraldborn Syiem, MLA ka Nongpoh kum u kongsan, ha ryngkat ka jingdon u Bah Charles Marngar, MDC ka Mawhati, u Bah RB Shadap, Bah RR Makdoh lem bad kiwei de ki riew rangbah ka thain.
Khyndiat haba phai sha katei kak jingiakhun phainal hapdeng ka Rongdop SC pyrshah ia ka Umdihar SC, ha kaba la iohi shisha ia kata ka jingiakhun kaba itynnad bad kaba la pynshongshit shikatdei eh ia ki paidbah kiba la leit ban sakhi, namar watla ka long ka jingialehkai ki khynnah rit, hynrei ki la lah pat ban pyni ia ka jingiakhun kaba itynnad.
Namar ba ka long ka jingiakhun kaba iakhaid, kumta naduh ka kylla step haduh ka kylla, kitei ki ar-kynhun kim shem la lah ban pynkhihjar, kumta na bynta ka rai jop rai rem ki nongpyniaid ki la rah noh sha ka Tie- Breaker bad dei hangtei ba ka Rongdop SC ka la ioh ban pynliem noh ia ka Umdihar SC da 3-2 kol bad kaba la pynthikna ia ka kynhun ba kan long kum ka lahduh ha katei ka lympung ialehkai ka RBDSA.
Phi don ban ong eiei?