Rah ka Pynthor A ia ka nam lahduh ka rong biria Seng Kut Snem

Shillong: Ka Rongbiria Seng Kut Snem ka Seng Khasi Kmie, Shillong, ka la long hapdeng ka jingshong shit ha kane ka sngi Robibar ba la wan iashim bynta shit rhem da ki rangbiria na kylleng jong ka Bri Hynñiewtrep Hynñiew Skum.

Tang ha ka iakob siat kynhun ki nongiashim bynta baroh ki la long haduh 95 ngut bad ha ka iakob siat ba para marwei la iashim bynta da kumba 196 ngut ki rangbiria.

Ha ka iakob siat kynhun, lahduh mynta ka snem dei ka kynhun ka Pynthor ‘A’ ba wan ba-ar dei ka kynhun na Sohra Rim ‘E’.
Haba phai pat sha ka iakob siat kaba para marwei, lahduh dei u Aibor.L.Mawphlang na Mawlai, ba-ar Samborlang Pyngrope na Mawusam bad ba wan ba-lai dei u Patsha Lyngdoh na Sohra Rim.
Ka song pisa ba la ai ha kane ka kynti iakob kaba mynta ka long ba ha ka iakob siat kynhun, ka Pynthor ‘A’ ka la leit phai sha la iing bad ka song pisa kaba long 25 hajar tyngka, katba ka Sohra Rim kaba wan ba-ar ka leit phai sha la iing bad ka song pisa kaba long 10 hajar tyngka bad nalor katta ka la don ruh ka jingsam ia ka song pisa kaba long mar 3 hajar tyngka sha ki ar kynhun bat ia ka kyrdan kaba lai.
Haba phai pat sha ka iakob siat ba para marwei, u nam tam ne lahduh u la ioh ban leit phai sha la iing bad ka song pisa kaba long 12 hajar tyngka ryngkat bad u nam rupa bad ba wan ba ar 5 hajar tyngka bad ba wan ba lai 2 hajar tyngka.
Kongsan ba la plie ia kane ka jingiakob dei u Rgh D.K Dkhar President Seng Khasi Kmie ryngkat ka jingiadon lang ki dkhot nongkit kam jong ka JPK Seng Khasi Kmie , la ioh ruh ia ka nguh ka dem ba la ai da ka kynhun U Tymmen U San Seng Khasi Kmie u Rgh Skor Jala bad ia ka jingiakob baroh kawei la pyniaid da ka Rongbiria Seng Kut Snem Komiti ka Seng Khasi Kmie.