Nongpoh: Ka Pahammawlein 20Mer Football Club, ka la ioh ban rah ia ka namlahduh ha ka 4th Maitshaphrang Football Tournament, hadien ba ka la lah ban pynliem noh pyrshah ia ka Kongripara Football Club da 1-0, ha ka jingiakhun phainal ba la long ha ka shnong Umling.
Ia katei ka lympung ialehkai la pynlong da ka KSU Pahammawlein Circle bad ha kaba pynkut ia katei ka lympung ialehkai la sakhi da ka jingdon u Samla Lambokstar Marngar, President ka KSU Sengkmie kum u kongsan, ha ryngkat ka jingdon u Samla Ferdynald Kharkamni, President ka KSU ha Ri Bhoi, ki dkhot ka KSU lem bad ki riew rangbah jong katei ka thain.
Ka Pahammawlein 20Mar FC, kaba la ioh ia ka namlahduh, ka la ioh ban khung ia ka song pisa kaba T.20 hajar lem bad ka Trophy, katba ka Kongripara FC kaba la shah rem noh ha katei ka phainal, ka la ioh ban khung ia ka song pisa kaba T. 10 hajar lem bad ka Trophy.
Ha kajuh ruh ka por, na ka bynta ban pynshlur ia ki samla kiba la lah ban ialehkai bha ha katei ka lympung, na ka liang ka KSU ka la sam ruh ia ki khusnam shimet, ha kaba ia ka nam Best Player la iod da u Sparkel Khongshei, Best Goalkeeper da u Andrias Kylla bad Top Scorer da u Donkupar Ryndong. Ha kane ka lympung la sam ruh ia ka khusnam Best Discipline Team ia kaba la rah da ka Umling Sports & Cultural Club.