Nongpoh: Ka Nartap Youth Sports Club, ka la ioh ban rah ia ka namlahduh ha ka lympung ialehkai kaba la tip kum ka Invitation Football Tournament 2019 ha shnong Nartap, hadien ba ka la lah ban pynliem noh pyrshah ia ka Jyntru Youth Sports Club da da 2-1, ha ka jingiakhun phainal kaba la long hynnin ka sngi ha shnong Nartap, Ri Bhoi.
La pynkut ia katei ka lympung ialehkai phutbol da ka jingdon u Bah Dipul Ryntathiang, kum u Kongsan, ha ryngkat ka jingdonlang u Samla Mission Tron kum symbud kongsan lem bad kiwei ki riew rangbah jong katei ka thain.
Haba phai sha katei ka jingiakhun phainal, ha ka kylla step jong ka jingiakhun ka Jyntru kaba la lah ban lamkhmat ia ka jingiakhun lyngba ka shikol, ha kaba ka kylla step, ka la long ba ka Jyntru ka la tam ia ka jingiakhun da 1-0.
Haba bteng ka kylla miet, ka jingiakhun ka la nangitynnad namar ki rangialehkai jong kitei ki arkynhun, ki la iakhun tyngeh bad ki la sei shisha ia kata ka sap ka phong bad kaba la pynshohbiej shikatdei eh ia ki paidbah kiba la sakhi ha katei ka jingiakhun phainal.
Katba ka jingiakhun ka la nangiaid shakhmat, ki rangialehkai ka Nartap ki la ioh ia ka kabu kaba biang ban thep ia ka shikol bad kaba la pyniakhaid da 1-1. Hynrei shwa ba ka jingiakhun kan poi noh sha kaba kut, ka Nartap ka la ioh biang ia ka kabu ban thep biang sa shikol bad kaba la pynthikna syndon ia ka kynhun ba kan iohran syndon ia ka nam lahduh ha katei ka lympung ialehkai, hadien ba ki la pynliem noh ia ka Jyntru da 2-1.
Ka Nartap kaba la ioh ban rah ia ka nam lahduh, ka la ioh ban khung ia ka song pisa kaba T. 30 hajar lem bad ka Trophy, katba ka Jyntru kaba la shah rem noh ha katei ka phainal, ka la ioh ban khung ia ka song pisa ba T. 15 hajar lem bad ka Triphy.
Nalor ka khusnam sha ki kynhun kiba la poi sha phainal, na ka liang ki nongpyniaid jong katei ka lympung, ki la sam ruh ia ki khusnam shimet, ha kaba ia ka nam Best Player la ioh da u Lucas Syngkli, Best Goalkeeper la ioh da u Bankyrshan Nongsiej bad u Edwin Maring u la ioh ia ka nam Top Scorer.
Phi don ban ong eiei?