Rah ka Nartiang PHC bad Rymbai PHC, ia ka khusnam ha Jaintia Hills

Jowai, 27 lyngkot:
Ka Nartiang PHC bad ka Rymbai PHC ki la ioh khur mar ar lakh tyngka kum ki PHC kiba biang ka rukom treikam kaba dei ka khusnam jong ka sorkar pdeng ia kaba la tip kum ka KAYAKALP Award.
Ia kane ka khusnam la aiti sha ki Doctor ba dei peit ia kitei ki ar tylli ki jaka ai jingsumar da u Dr. RC Laloo, Myntri rangbah ba-ar ha West Jaintia Hills na ka bynta ka Nartiang PHC bad da u ma Sniawbhalang Dhar, Myntri ba dei peit ia ka PHE bad Bording ha ka jingiarakhe Republic day mynta ka sngi ha Jowai bad Khliehriat. Ka jingrakhe Republic Day kaba 68 ha Jowai bad Khliehriat kumjuh ha Amlarem ka la long kaba shongshit bha.
Ha Khliehriat, ha madan ialehkai ka Khliehriat Secondary School, la wan ban iashim bynta haduh 13 tylli ki kynhun parade kynthup ia ki pulit bad khynnah skul. La pynlong ruh ia ka Cultural Program bad Fashion Show ia kaba la wan ban ia shim bynta da ki samla bha briew bad bit riam jong ka East Jaintia Hills.
Ha madan Jrisalein ha Jowai. U Dr RC Laloo u la pynher ia ka lama lai rong bad u la ai ka jingkren kaba long solansar ha kaba iadei bad ka roi ka par ha ka jylla bad ka jingthmu jong ka sorkar hapoh ka jingialam u Dr. Mukul Sangma kum u myntri rangbah ka jylla.
Ha Jowai ki la don haduh 27 kynhun ki kynhun parade kynthup ia ki pulit MPP, pulit 3rd Battalion, ki Scout and Guides, ki home Guards, NSS Thomas Jones, Kiang Nangbah bad ki skul bapher bapher.
Ia ka nam lahduh ha ka parade la ioh khur da ka Govt Boys higher secondary School, Jowai bad ka Government girls ka la wan ba lai. Katba ka QC Springsides ka la wan ba ar. Ka shad Cultural, ka jingpyni ia ki tableau da ki tnad sorkar bapher bapher ki long kiwei pat ki jingpynitynnad ia kane ka sngi.