Nongpoh: Ka Umsawkhwan Sports & Cultural Club (US&CC), kaba la mihkhmat na ka Meghalaya ha ka Sunfeast Cup 2018, ka la ioh ban rah ia ka nam lahduh hadien ba ka la lah ban pynliem noh ia ka Mizoram da 3-2, ha ka jingiakhun phainal kaba la long myn hynnin ha Nongbah Gauhati.
La ioh jingtip ba ha katei ka jingiakhun phainal, ka la long shisha kaba iakhaid bad itynnad bha, ha kaba ka kylla step jong ka jingiakhun dei ki rangialehkai jong ka (US&CC), kiba la lah ban lamkhmat ia ka jingkhun da shikol bad kaba la pynkut ruh ia ka kylla step da 1-0.
Haba la bteng ka kylla miet jong ka jingiakhun, ki rangialehki jong kitei ki ar-liang mamla, ki la iakhun tyngeh bad sei ia la ki buit ki sap ialehkai na ka bynta ban iohrah ia ka namlahduh ha katei ka jingkhun bad dei ha kaba kum katei ka por ba ka kynhun ialehkai na Mizoram, ka la ioh ban pynphai ia katei ka shikol bad ki la pynkut ruh ia ka kylla miet da ka jingiakhaid kaba 1-1.
Na bynta ka rai jop rai rem, ki nongpyniaid ha katei ka jingkhun ki la rah noh sha ka Tie-Breaker bad dei hangtei ba ka US&CC ka kynhun kaba la mihkhmat na Meghalaya, ka la lah ban pynliem ia ka kynhun ialehkai na Mizoram da 3-2 bad rah syndon ia ka namlahduh ha ka jingiakhun hapdeng ki kynhun ialehkai na Northeast.
Ka US&CC, kaba la ioh ban rah ia ka namlahduh, ka la ioh ban khung ia kak song pisa kaba T.75 Hajarm, ha kajuh ruh ka por la sam ruh ia ki khusnam shimet bad ia ka nam Top Scorer la ioh da u Shemjingmut Kharmyndai, Best Goalkeeper da u Reform Shilliang, kiba dei ki rangialehkai ka US&CC, katba ia ka nam Best Coach la ioh da u D. Pale.