Nongpoh: Ka Makason Football Club, ka la ioh ban rah ia ka namlahduh ha ka 1st Maitshaphrang Football Tournament 2018, kaba la pynlong da ka KSU Mawdem Unit, hadien ba ka la lah ban pynliem noh pyrshah ia ka Umsohbnang FC da 4-2, ha ka jingiakhun phainal kaba la long ha Madan ialehkai ka shnong Mawdem.
Ha kaba pynkut ia katei ka lympung ialehkai ka KSU, Mawdem Unit, la sakhi da ka jingdon u Samla Alexius Narleng, Vice-President ka KSU ha Ri Bhoi uba la long ruh kum u Kongsan ha katei ka sngi, u Bah Receive Pator, President ka Western Border Area lem bad kiwei kiwei ki riew rangbah jong katei ka thain.
Khyndiat haba phai sha katei ka jingiakhun phainal, ka la long shisha ka jingiakhun kaba itynnad bad iakhaid bha, namar ki rangialehkai jong ki arling mamla, ki la sei shisha ia kata ka sap ka phong bad khamtam eh ban long kum kynhun lahduh ha katei ka lympung ialehkai.
Haduh ban da kut baroh ar ki kylla jong ka jingiakhun, ym shem la don ka kynhun kaba la ioh ia ka kabu ban pynkhihjar, kumta na ka bynta ban ai ia ka rai jop rai rem, ki nongpyniaid jong katei ka lympung ialehkai, ki la rah noh sha ka jingiashut Tie Breaker bad dei hangtei ka ka Makason FC ka la lah ban pynliem noh ia ka Umsohbnong FC da 4-2 bad rah syndon ia ka nam lahduh ha katei ka lympung ialehkai kaba la pynlong da ka KSU.