Shillong: Ka Maitshaphrang XI ka la rah ia ka nam lahduh hadien ba ka la pynliem pyrshah ia ka Pararo XI ha ka jingiaknieh ia ka nam lahduh ka 1st (L) Pilat J. Khongkliam Memorial Trophy ba la pyniaid da ka Mawshun Sports and Cultural Club (MS&CC), Mawshun ba long ha ka 31 tarik Nohprah 2018.
Ha kane ka sngi, la donlang u bah Hiwbert Mawlong kum u kongsan ba dei ruh Manager jong ka Banalari Football Club, Shillong, ba la don u Sordar jong ka Raid Mawshun, ki riew rangbah na ka Shnong, bad kiwei.
Ha kane ka jingialehkai, la wan iashim bynta kumba 25 tylli ki kynhun.
Ha ka jingiakhun ha Madan Shnong Mawshun hapdeng kitei ki ar tylli, ka long shisha ka jingiakhun kaba itynnad ba mar kat juh bor hynrei ha kaba kut ka jingialehkai ka Maitshaphrang XI ka la ioh rah ia ka nam lahduh lyngba ka 1 kol na u Mankupar Rymmai uba la ioh rah ruh ia ka nam best player jong mynta u snem.
U Kongsan Bah H. Mawlong ha ka jingai jingkren jong u ha katei ka sngi u la ai shisha ka jingiaroh ia ka Club ba ka la lah ban pynlong ia kum kane ka jingialehkai ka ban kyntiew ia ka sap ka phong ki khynnah samla jong ka shnong bad ka thain hi baroh kawei.
La ioh ruh ia ka jingpule khana lyngkot da u Secretary jong ka Club, u Samla Pynskhemlang K. Masynting shaphang ka jingim jinglong une u rangbah Pilat ba ka club ka ai burom ha u, uba dei ruh u nongseng ia ka skul Lumjingtip Secondary School Mawshun kaba mynshuwa la ai kyrteng ka Lumjingtip M.E. School Mawshun.
Ha katei ka sngi, la don ruh ka jingialehkai Penalty Shout-Out mynstep bad hadien kane la ioh sa ka jingialehkai na ki khynnah kynthei.
Ha katei ka sngi phainal ka M.S & C.C la ioh ruh ban pynkup burom ia ki khynnah skul jong ka shnong Mawshun kiba la pass bha ha ki examin ba pher bapher mynta u snem naduh matrik shaneng, lah ong ka kyrwoh na u bah Pynskhemlang K. Masynting, u Secretary ka Mawshun Sports & Cultural Club.