Rah ka Lawmali ia ka nam lahduh ka phutbol ki shipai ha Laitkor

Shillong: Ka kynhun ka Lawmali SC ka la rah ia ka nam lahduh ha ka lympung ialehkai phutbol ki shipai ka Assam Rifles Invitational Football Cup 2020’ ba la pynlong da ka HQ Assam Rifles, Shillong.

Ka Lawmali ka la pynliem ia ka Umphrup SC da 5-0 kol ha ka jingiaknieh ia ka nam lahduh myn hynnin ka sngi ha madan ialehkai ki shipai ha Laitkor, Shillong.

U Myntri rangbah ka Jylla u Conrad K Sangma u la long kum u kongsan ryngkat ka jingdonlang u MS Rao, IAS, Chief Secretary ka jylla.Ia u Myntri rangbah la pdiang bad pynkup burom da u Director General Assam Rifles, u Lieutenant General Sukhdeep Sangwan ha ka jingdonlang ki heh shipai Assam Rifle.

Haba ai jingkren ha kane ka sngi, u Conrad u la iaroh ia ka Assam Rifles kaba la pynlong ia ka tournament man u snem ula ong ba kane ka tournament kam dei tang ban plie lad ia ki khynnah ialehkai ban pynpaw ia la sap ka talen jong ki hynrei ka long ruh ka lympung ban lum lang ia ki paidbah ha ka imlang sahlang.

‘Ban kyntiew ia ka kam ialehkai ha ka jylla. ha ki ar snem ban wan ka sorkar kan pynlut kumba T. 450 klur ban shna ia ki jaka ialehai bapher bapher kylleng ka jylla. ka sorkar ka la pynkhreh bad shim khia ban kyntiew kyrdan ia ka P.A. Sangma stadium ha Tura sha ka Integrated Sports Complex. Kan long ka jaka ialehkai ba heh ha ka jylla bad kumjuh ia ka phutbol, ula ong.Ka sorkar ka don jingthmu ban kyntiew ia ka phutbol ha ka jylla u myntri rangbah ula bynrap ba ka jingpynhkreh ia ka iaid ban shna ia ka international football academy ha nongbah Shillong ban sei ia ka sap ka talen ki khynnah kynthei bad shynrang ha ka phutbol.

U Director General ka Assam Rifles ula ai khublei ia u myntri rangbah uba la pyllait por ban donlang ha kane ka sngi pynkut kum shibynta ban ai mynsiem ia ki rangialehkai phutbol ka jylla. Ula ai mynsiem ruh ia ki khynnah kiba la shim bynta ha ka lympung, ki coach bad manager jong ki kynhun bapher bapher.
U la pynbna ruh kum shibynta ban kyntiew ia ka jingialehkai ha ka thain lam mihngi, ka Assam Rifles ka la shah jied ha ka sorkar pdeng ban pynlong ia ka Assam Rifle Public School, Shillong ka slem ai jinghikai ban bei pisa hapoh ka skhim ‘Khelo India’. ‘Ka long ka skul ba-ar ha ka ri kum ka Sports School Rai, Sonepat (Haryana) ka long ka jingsarong ia ka Assam Rifles bad ka jylla’, ula bynrap.
Ka Lawmali ka la rah ia ka khusnam lahduh da ka song pisa ba T.1,00,000/-kaba ka Umphurp kaba wan ba-ar ka ioh rah ia ka song pisa ba T.50,000/- ryngkat ka khusnam.