Shillong: Ka Shillong Lajong FC ka la rah ia ka nam lahduh ka U-18 Youth League National Championship hadien ba ka la pylliem 2-0 kol ia ka Kerala Blasters ha ka jingiaknieh ia ka nam lahduh kaba long ha ka sngi Saitjaiñ ha madan JN Stadium Polo.
Ia ka kol kaba nyngkong eh ka Lajong la thep hi da u rangïalehkai ka Kerala Blasters, u Lins P Poulose ha ka minit kaba 3 jong ka kylla step kaba la pynduh mynsiem shibun ia kane ka jingialehkai.
Ka kol kaba ar kol la ioh ban thep ynda jan poi artad shaba kut, da u Kynsailang Khongsit ha ka minit kaba 90+2 kaba la pyntikna syndon ïa ka Shillong Lajong ban jop donburom da 2-0 kol bad rah syndon ïa ka nam lahduh jong ka U-18 Youth League mynta ka samoi.
Ka Shillong Lajong ka dei ka kynhun kaba khlem shah rem satia wat tang shi wat ruh na ki 55 tylli ki kynhun kiba shim bynta ha katei ka lympung. Nalorkata, katei ka kynhun na ka nongbah Shillong ka la ïoh ruh ban thep haduh 23 tylli ki kol bad shah thep pat tang lai tylli.
Ki rangïalehkai ka Shillong Lajong naduh ba sdang jong ka jingïakhun ki la ïoh ban tehlakam bad ïoh ruh bun tylli bha ki kabu ksiar hynrei ka ïoh pat ban pynurlong tang kawei ka kol.
Ha kajuh ka por ka Shillong Lajong ruh ka la nang ïai ïakhun tyngeh ban ïoh thep kol biang khnang ban pyntikna ïa ka jingjop pynban kim shym la ïoh lad.