Rah ka kong Menarisha, kum ka longkmie bhabriew ka Ri-Bhoi

Shillong, 29’lyngkot:
Ka kong Menarisha Sohphoh na ka shnong Umsamlem ka la rah ia ka nam bhabriew ha ka jingiakob longkmie bhabriew ne ka Mrs Ri-Bhoi ba la pynlong da ka Women Organisation of Ri Bhoi District (WORD) kaba la long ha Umsning ha ka sngi saitjaiñ. Ki la don haduh 19 ngut ki longkmie kiba la ia shim bynta ha katei ka jingiakob. Ia ka 1st Runner’s Up la rah da ka kong Mary Jones Diengdoh na Lumnongrim Umsning, second runner-up la rah da ka kong Lakyntiew Syiemlieh na Lumumpih Umsning.
Ia ka nam Mrs. Beautiful Smile la jop da ka Biyorist Thangkhiew na Nongjri, Mrs. Cat Walk da ka kong Aibianglin Lapang na Nongjri, Mrs. Photogenic kong Livaralis Mawrie na Pahamsyiem Nongpoh, Mrs. Beautiful eyes la ioh da ka kong Lakyntiew Syiemlieh na Lumumpih bad Mrs. Perfect ten la jop da ka kong Sinaris Lyngdoh na Umsamlem.
Ïa kine ki longkmie la bishar da ka jingdon jong lai ngut ki nongbishar kiba kynthup ïa ka Mrs. Asia 2015 ka Nupur Saigal, ka 1st Miss Ri Bhoi kong Samaria Pathaw bad ka 2nd Runners Up jong ka Miss Winter Queen 2015 Ibapynhun Eve Syiemlieh. Ka khusnam na bynta ki nongjop ha katei ka sngi ki long T.20 hajar ia ka lahduh, T.10 hajar ia kaba-ar bad T.5000 ia kaba lai bad ka la don ruh ka khusnam kyrpang kaba la ai mar T.2ooo tyngka.
Ha katei ka sngi la donlang ruh u MDC ka Umsning u bah Donkupar Sumer, u MDC ka Mawhati u bah James Sylliang, ki ADM na ka ophis u DC, ki ophisar ka tnad PHE, Soil and Water Conservation, Water Resources, na ka ophis u DMHO bad na kiwei ki tnat kynthup ruh ka jingdon jong u Chairman ka Umsning Town Dorbar bah Dipul Ryntathiang bad ki para member bad ki seng longkmie kiba la wan na kylleng ki shnong jong ka thain Ri Bhoi.
La ioh ruh ka jingkren na u Adviser jong ka WORD u bah Kyrmen Uriah uba dei u trai shnong na katei ka shnong.Kane ka long katkum ka kyrwoh khubor na ka kong Reviewlett Kylla General Secretary ka WORD.