Nongpoh: Ha kaba pynkut noh ia ka lympung ialehkai, kaba la pynlong da ka Sohpdok Sports & Cultural Club, ka Thad Sports Club, ka la ioh ban rah ia ka nam lahduh ha katei ka lympung Ialehkai phutbol, hadien ba ka la lah ban pynliem noh ia ka Nongjri Spotrs Club da 1-0, ha ka jingiakhun phainal kaba la long hynne ka sngi ha Madan ialehkai ka shnong Sohpdok ha Ri Bhoi.
Ha kaba pynkut ia katei ka lympyng ialehkai, la sakhi da ka jingdon u Samla Dasakhiatbha Lamare, MLA ka Mawhati, uba la long ruh kum u kongsan ha katei ka sngi lem bad kiwei pat ki riew rangbah jong katei ka thain, kaba kynthup ia ki nongialam shnong ka Sohpdok lem bad kiwei.
Haba phai sha katei ka jingiakhun phainal, da shisha ka la long ka jingiakhun kaba itynnad bad kaba iaryngkat bor, kumta namar ka jingiakhaid ka la pynlong ruh ia ka jingiakhun jong ka kylla step ba kan iakhaid da 0-0.
Haba bteng ka kylla miet ka jingiakhun, ki rangialehkai jong kitei ki ar-kynhun, ki la ialeh shitom na ka bynta ban pynkhihjar, hynrei ha kaba kum katei ka khep, uwei na ki rangialekai ka Thad SC, u la ioh ia ka kabu kaba biang ban thep kol bad katei ka shikol, ka la neh haduh ba kut ka jingiakhun bad kaba la pynthikna syndon ia ka Thad SC ba kan rah ia ka nam lahduh ha katei ka lympung ialehkai phutbok ha Sohpdok.
Ka Thad SC, kaba la ioh ban rah ia katei ka namladuh, ka la ioh ban khur ia kak song pisa kaba T. 12 Hajar, katba ka Nongjri SC kaba la shah rem noh ha katei ka phainal, ka la ioh ban khur ia ka song pisa kaba T. 6 hajar.
Ha kawei pat ka liang, ha kane kajuh hi ka sngi, na ka liang ki nongialam shnong ka Sohpdok, ki la pynkup burom ia ki samla kiba la pass bha ha ka SSLC bad HSLC, ia kaba la pynkup burom da u samla Dasakhiatbha Lamare.
Phi don ban ong eiei?