Shillong: Ka Skul H Elias HSS, ka Umthli SS bad ka Umpohliew Jingtip baroh ki dei na skul na East Khasi Hills kin mihkhmat ia ka jylla hadien ba ki la rah ia ka nam lahduh ka State Level Inter School Football Tournament Subroto Mukherjee Cup 2018 ha ka jingiakhun kaba long myn hynnin ka sngi ha JN Stadium, Shillong.
Kine ki lai tylli ki skul kin leit mihkhmat sha ka rynsan ka ri kaban sa long shen ha kine ki bnai ban wan.
Ha ka jingialehkai phainal kaba long mynta ka sngi, ka skul H Elias HSS ka la pylliem ia ka North Liberty HSS, West Jaintia Hills da 4-3 kol da ka shut bol ne tiee-breaker hadien ba la iakhaid ha ka jingiakhun ha madan ha ka U-17 snem ki shynrang.
Ka Umthli SS ka la pylliem ia ka Musnieng SS da 3-2 kol da kajuh ka rukom kata da ka shut bol hi hadien ba ki la iakhaid ha ka jingiakhun ha madan ha ka U-17 ki kynthei.
Katba ka Umpohliew Jingtip HS ka la pylliem ia ka Rymbai Govt SS da 6-1 kol ha ka jingialehkai jong ki khynnah shynrang. Ia kine ki kol ka Umpohliew la thep da u Sainpyniar Lyngdoh ha ka 6, 31 mint, Colinsalmon Lyngdoh ha ka 11, 14 minit, bad u Arbunsing Waruri ha ka 37 bad 44 minit bad kawei ka kol ia ka Rymbai la thep da u Nistelroy Dkhar ha ka 18 minit.