Rah ka Driver Iew Mnar FC ia ka namlahduh ka phutbol ka FKJGP ha Jirang

Nongpoh: Ha kaba pynkut ia ka lympung ialehkai ka lympung ialehkai phutbol kaba la pynlong da ka Jirang Circle ha madan ialehkai ka shnong New Jirang, ka kynhun ialehkai ki nongniah kali bad kaba la tip kum ka Driver Iew Mnar FC, ka la ioh ban rah ia ka namlahduh, kata hadien ba ki la lah ban pynliem noh pyrshah ia ka Umkynsier SC da 3-0.

Kiba la donlang ha katei ka sngi, ki kynthup ia u bah Dundee Clif Khongsit, General Secretary ka FKJGP Sengkmie, kum u kongsan, nangta u bah Luistar Lyngdoh, President ka FKJGP ha Ri Bhoi kum u symbud kongsan, ha ryngkat ka jingdonlang kiwei de ki nongialam ka FKJGP, kiba kynthup ia u samla Sainborlang Thangkhiew, President ka FKJGP, Jirang Circle lem bad shibun kiwei pat ki riew rangbah jong katei ka thain.

Ka Driver Iew Mnar FC, ka kynhun ialehkai kaba la long kum ka lahduh ha katei ka lympung ialehkai, ka la ioh ban khur ia ka song pisa ka T. 30 hajar lem bad ka Trophy, katba ka Umkynsir SC, kaba la shah rem noh ha katei ka phainal, ka la ioh ban khur ia ka song pisa ka T. 15 hajar lem bad ka Trophy.