Rah ia ka ishu kam pud ha iing dorbar, dawa ka HYC

Shillong: U President ka Hynniewtrep Youth Council (HYC) u bah Robertjune Kharjahrin, u la ong ba ha ka jingialang ban ia syllok halor u pud u sam kaba la long myn hynnin ka sngi, na ka liang ka seng ka la ai jingmut ba shuwa ba ka sorkar kan rai khadduh ia kane ka bynta ka dei ban rah shwa hapoh ka ingdorbar thawain jong ka jylla.

Haba iakren bad ki lad pathai khubor u Bah Kharjahrin, u la ong ba la ai jingmut ia ka sorkar ba shwa ban shim ia kano kano ka rai ha kaba iadei bad u pud u sam, ka sorkar ka dei ban rah shwa hapoh ingdorbar thawain ban iatai iakane ka bynta khnang ba kan don ka jingiamynjur lang ia kane ka rai.

U President ka HYC u la ai khublei ia ka sorkar MDA kaba la khot ban ia syllok lang halor ka mat ban pynbeit ia u pud u sam, ha kaba na ka liang ka sorkar ka la iathuh ia kaei ka ba ki Regional committee ki ladep leh hakine ki khynniat bnai, bad kane ka jingsdang ban pynbeit pud kan long shuwa ha ki 6tylli ki sector katba ki wei pat ki sector kiba kham eh, na ka liang ka sorkar kan pynbeit ha ka pali ba ar.

“Na ka liang ki sengbhalang ki pdiang ia ki san tylli ki principal ki ba la pynbeit da ki ar jylla ha kaba iadei bad ka jingpynbeit noh ia u pud u sam”u la ong.
“Na ka liang ka HYC ka la ai jingmut ruh ia ka sorkar jylla ba kam dei ban ailad ia ka Sorkar Assam ba kin pyndonkam ia ki notification ki ba la pynmih khlem ka jingia mynjur lang ki khlieh nongshynshar “u la bynrap.
U bah Robertjune u la ong ruh “Ha u snem 1951 khlem ka jingmynjur ki khlieh nongshynshar na ka jylla ka Assam kala kurup da ki spah tylli ki shnong sha Assam”.

“Ka seng ka la dawa ruh na ka sorkar ba ha ka jingpynbeit ia u pud u sam, kam dei ban shah ia ka Assam ba kan pyntreikam ia ki ain ki ba kynthup ia ka Assam recoganisation Act 1969 bad ia ka North East recoganisation Act 1971, ki act kiba la weng ia ka Block I, II na ka jylla”u la ong.

U la ong ruh “Ngi la dawa na ka sorkar ba kadei ban tehlakam ia ka Assam na ka jingwan tam pud sha ka jylla Meghalaya, namar Kat ki jingtip ba ngi ioh ka Assam kala sdang ban tam sa sha ki jaka byndei ki ba iaknieh”.
Ka Seng ka la dawa ruh na ka sorkar ban the lakam halor ki jingbyrngem byrsit na ka liang ka Assam ban pynbor ia ki nong Meghalaya ba ki dei ban wan pyniasoh noh sha ka jylla Assam.