Pyrta shnong u Sirdar Mawlong khlem Dorbar:KSU Umwai

Shillong, 15 Risaw:
Ka seng KSU Umwai unit hapoh ka jingialam jong u President bad u Secretary jong ka KSU Umwai ki la ong ba ka seng ka pynpaw ia ka jingsngewkhia halor ka jingkhein dewthala jong u Sirdar Mawlong Sidarship ia ki paidbah jong ka shnong Umwai.
Katkum ka khubor la ong ba na ka liang jong ka ophis jong u Sirdar ki la pyrta shnong ha ka 10 tarik mynta u bnai ba ka don ka dorbar kyrkieh ha ka 12 tarik mynta u Risaw, ki paidbah jong kane ka shnong da ka jingkohnguh ia ka hukum jong u Sirdar ki la iehnoh ia la ki kam ki jam ha katei ka sngi ba kin leit mih ba kin tip ia kata ka daw ia ka jingkhot kyrkieh ia katei ka dorbar.
Hynrei kaba sngewsih ka long ba u Sirdar jong katei ka Hima Mawlong u la shet shukor ia ki paidbah ha katei ka sngi ha kaba u ialade u khlem wan mih satia ha katei ka dorbar .
Kane ka jingleh bym kheinsnep jong u Sirdar ia ki paidbah jong kane ka shnong ka pyni shai kdar ia ka jingniew bein jong u ia ka shnong baroh kawei.
“Ngi pynrem jur ia kane ka jingleh jong u Sirdar kaba ktah mationg ia ngi kum ka shnong baroh kawei bad ngim lah ban pdiang da lei lei ruh em”, la ong ka seng.