Pyrta shnong ha ki shnong jongphi, mih paidbah ha ka 5 tarik: SNSBH

Shillong, 3 Naiwieng:
Ka Synjuk ki Nongsynshar Shnong ka Bri u Hynniewtrep lyngba ka kyrwoh ba la phah da u General Secretary u bah RL Blah ka la ong ba ha ka 2 tarik ha ka jingialang jong ka Executive Committee jong ki, ki la rai ban iaid beit ia ka rai jong ka 30 tarik U Risaw kata ban leit tur beit sha khmat khyrdop ka Secretariat ha ka 5 tarik u naiwieng, 2015.“Sa shisien ka Synjuk ka pynkynmaw bad ka kyrpad jur ia phi ki paidbah  kiba long ka kti ka mon ka kti ka diang ha kane ka jingiaksaid na ka bynta ka Ri bad ka jaidbynriew ba phin iamih ryntih biang sa shisien ha ka 5tarik Naiwieng 2015 ban leit tur sha khmat ka khyrdop jong ka Main Secretariat” ong ka kyrwoh khubor. La pynbna ruh ba ha katei ka step kan don ka jingiakynduhlang ha Madan Laban Sports Club (kaba don ha lyndet Red Cross) ha ka por 10:30 baje mynstep. “Ngi kyrpad ia baroh ki Dorbar Shnong ban pyrta shnong ha ki shnong ki jong phi ban kyntu ban ia mih paidbah ha katei ka sngi” ong shuh shuh ka kyrwoh.Ha kawei pat ka khubor ka Synjuk Ki Rangbah Shnong (SKRS) Ri Jaintia ka pyntip bad kyntu ia uwei pa uwei u Rangbah Shnong ha ki Dorbar Shnong bapher bapher ha Ri Jaintia ba kin pynbna bad pyrta Shnong ban ia mih paidbah ban wan kiew sha Shillong ha ka 05 tarik u Naiwieng, 2015 ban ai ia ka jingkyrshan kaba pura ia ka Synjuk Ki Nongsynshar Shnong ka Bri U Hynniewtrep (SNSBH) Khasi Jaintia. Kumta la kyrpad jur ia ki Rangbah Shnong ba kin sngewbha ban shim khia ia kane ka kam iap kam im ka jaidbynriew bad ban sei briew ar shah ia kiba poi ha ka kane ka proseshon ba ladep.
Shuh shuh sa ha kawei pat ka khubor ka Dorbar Ki Rangbah Shnong Ri Bhoi (DRSRB) mynta ka sngi ka ka la rai ba kan ai ka jingkyrshan ba pura sa shisien ia ka SNSBH bad ka kyntu ia uwei pa uwei u nongshong shnong bad ki Rangbah Shnong ha ki Dorbar Shnong bapher bapher ha Ri Bhoi ba kin ia mih paidpah ban kiew sha Shillong ha ka 05 tarik u Naiwieng, 2015 ban ia iaid lang sha khmat ka khyrdop Secretariat main Building kumba la rai ha ka 30 tarik U Risaw, 2015 ha ka Procession Bah.
Katba ha kawei pat ka khubor kaba dang ioh lum Ka Synjuk Ki Rangbah Shnong Ri-Bhoi kaba kynthup ia 80 tylli ki shnong ka la rai kut ba kan ym leit ban ia don bynta lang ha ka proseshon ba la khot da ka Synjuk Ki Nongsynshar Shnong ka Bri u Hynniewtrep ka ban long ha ka 5 tarik u naiwieng. Ia katei ka rai katei ka Synjuk k ala shim ha ka jingialang jong ka Executive Committee jong kaba la long mynta ka sngi namarba ki nongialam jong ka SNSBH kim shym la treh ban leit ia kren bad u Myntri Rangbah ka jylla u Dr.Mukul Sangma ha ka jingkhot ia kren jong u na ka bynta ka VAB. Katei ka Synjuk ka kwah ba ki nongialam ka SNSBH kin ia phylliew jingmut bad ka sorkar ban ia kren ba ia ka VAB yn pynlong aiñ noh lyngba ka jingmynjur noh u Lat. Ia katei ka kyrwoh khubor la soi da ki 17 ngut ki Rangbah shnong ba kynthup ia u bah S.Basaiawmoit RS Lumsohpdeng, P.Dkhar RS Umroi, bad kiwei pat.