Shillong 1 Nailar: Hadien ba ki nongtrei ka All Meghalaya SSA Non-teaching Staff Association, ki la pynlong ka jingiakhih da kaba shong kyllain mungor ha Madan Malki,ka ba ki la sesng hynnin ka sngi palei, ha kaba iadei bad ban dawa kyntiew ia ka tulop, mynta ka nohphai sngi ka 1 tarik u nailar 2024, nakaliang ka sorkar ka la khot ban iakren bad ki nongialam katei ka kynhun.
Haba iakren bad ki lad pathai khubor ka kong Jenniferjune Synrem i ba dei i president ka kynhun ka la iathuh, ba hynnin ka janmiet u Vijay Kumar u ba dei u Commissioner & Secretary ka sorkar jylla u la wan sha ka jaka ba pynlong jingiakhih, da kaba kular ban rah ktien sha u myntri rangbah ka jylla ban iakren.
Kumta nakaliang ki nongialam ka kynhun ki la ioh ia ka fone call na u Vijay Kumar mynta ka janmiet hi ha kapor kumba 5:20 eiei, ban leit iakynduh ia u CM.
Ka kong Jenniferjune ka la ong ruh, ba ngi da kyrmen eh, ba ka jingiakren jongki bad ka sorkar kan long ka ba pynkmen bad ban ai ia u soh jong ka jingjop katkum na ka jingdawa jongki.
“Ym tang katta hynrei la sakhi ruh, ba hashwa ba ki nongialam ka kynhun kin mih ban leit iakren, ki nongtrei baroh ki la pyrta da ka ba ong,”All The Best”.
Haba kylli pat ha kaba iadei bad ka jingshong kyllain mungor khlem buh sngi, ka kong Jenniferjune ka la iathuh, ba kidon ki ba thiah ha katei ka jaka pynlong jingiakhih bad kidon ruh ki ba leit phai, bad ka bam ka dih ki ia rah hi la kajong kajong.
Phi don ban ong eiei?