“Pyrshang U Mukul ban pynlong ia ka Politik kum ka kam ing kam sem”

Shillong, 22 Iaiong:
U bah David Kharsati u ba dei ruh u General Secretary ka BJP ha kane ka jylla u la kynthoh ia ka jingsei ka Congress da ka kurim u myntri rangbah ka jylla ban ia khun ha ka elekshon MP shiteng samoi na Tura konstitwensi ha kaba u la ong ba u myntri rangbah u la pyrshang jubor ban wanrah ia ka kam saiñ hima sima ha ka jylla sha ka kam ing kam sem jong u. “Ngi la iohi lypa ia kata ba u pyrshang ban pynlong ia ka Politik kum ka Family Business” ong u bah David ha ka jingiakren mynta ka sngi bad u Rupang.
U bah David u la ong ruh ba haduh mynta ka BJP ha kane ka jylla kam pat shim ia kano kano ka rai la yn buh kyrtong ne-em ha katei ka elekshon shiteng samoi hynrei ka jingiakren halor katei ka kam ka dang iaid sha khmat, “Ngim pat ia kren la ngin pynieng kyrtong ne ngin kyrshan ian iano, ngin sa shong pyrkhat bha ia katei ka kam ha ka lah sngi u blei” u la ong.
Lah ban kdew ba ka BJP ka dei kawei na ki seng saiñpyrthei kaba la don jingiasngewthuh jingmut bha bad ka seng NPP ha ka elekshon MDC ha GHADC kaba dang shu dep long shen bad kitei ki ar tylli ki seng ki donlang ha ka juh ka kynhun synrop kaba bat ia ka bor synshar ha KHADC. La iohi ba ki don ka jingiasngewthuh jingmut kaba skhem ha katei ka elekshon ba la dep ha kaba ha ka jaka ba la pynieng kyrtong ka NPP ka BJP kam pynieng shuh bad ha ka jaka ba ia khun ka BJP ka NPP ruh kam buh kyrtong. La sngewthuh ha kane ka sien ba mynta ruh lada jia ba ka BJP kan ym lah ban sei kyrtong ha katei ka elekshon shiteng samoi kan ai ka jingkyrshan ia u Conrad Sangma ka NPP.